სეპარატისტული აფხაზეთის ე.წ. საგარეო საქმეთა მინისტრი მაქსიმ ღვინჯია აცხადებს, რომ "ადამიანის უფლებების დამცველი დამკვირვებელთა მისიის" შექმნა საჭიროა არა აფხაზეთსა და ე.წ. სამხრეთ ოსეთში, არამედ საქართველოში. ეს განცხადება სოხუმის კრიმინალური რეჟიმის ე.წ. მინისტრმა რეინტეგრაციის საკითხებში საქართველოს სახელმწიფო მინისტრის თემურ იაკობაშვილის განცხადების კომენტირებისას გააკეთა.
თემურ იაკობაშვილმა ევროკავშირის ადამიანის უფლებათა დაცვის კომისართან თომას ჰამარბერგთან გამართული შეხვედრის შემდეგ განაცხადა, რომ აუცილებელია აფხაზეთსა და ე.წ. სამხრეთ ოსეთში ადამიანის უფლებების დამცველი დამკვირვებელთა მისიის შექმნა.
ღვინჯია აცხადებს, რომ საქართველოში დღემდე არსებობენ პოლიტპატიმრები, მაშინ როდესაც აფხაზეთში ისინი არც იყვნენ და არც არიან.
"საქართველოში კი ხელისუფლებასთან დაპირისპირებული ადამიანები ან უკვალოდ ქრებიან ან იღუპებიან გაურკვეველ გარემოებებში ან ციხეებში ხვდებიან. ამიტომაც საერთაშორისო საზოგადოებამ ადამიანის უფლებების დაცვის დამკვირვებლების კომისია საქართველოში უნდა შექმნას", _ აცხადებს აფხაზეთის ე.წ. საგარეო საქმეთა მინისტრი.
