პატიმართა უფლებების დაცულობის შემოწმება უშუალოდ სამოქალაქო საზოგადოებრივი ორგანიზაციების მხრიდან არის უმთავრესი საკითხი, - ამის შესახებ "ციხის საერთაშორისო რეფორმის" ხელმძღვანელმა ნაზი ჯანეზაშვილმა სასჯელაღსრულების ახალ მინისტრთან კახა კახიშვილთან შეხვედრამდე განაცხადა. მისი თქმით, მინისტრთან შეხვედრაზე არასამთავრობო ორგანიზაციები სწორედ ამ საკითხს დასვამენ.
"პირველ რიგში დავაყენებთ საკითხს, რომელიც ეხება საზოგადოებრივი მონიტორინგის მექანიზმის შექმნას. ეს არის ყველაზე არსებთი და მნიშვნელოვანი საკითხი სამოქალაქო საზოგადოებისთვის, რათა პატიმართა უფლებების დაცულობა შემოწმდეს უშუალოდ სამოქალაქო საზოგადოებრივი ორგანიზაციების მხრიდან. ამას ვითხოვთ, უკვე მრავალი წელია. 2011 წელს პრეზიდენტსაც კი მივმართეთ, რომ გარკვეული ნაბიჯები გადადგმულიყო, მაგრამ არანაირი ქმედითი ღონისძიებები ამ მიმართულებით არ გადადგმულა. ვფიქრობ, სამინისტროა ის უწყება, რომელსაც შეუძლია ამ მხრივ საზოგადოებრივ ორგანიზაციებს დაეხმაროს და შეასრულოს მისი ვალდებულება. მეტიც, ასოცირების დღის წესრიგში პირდაპირ წერია, რომ პენიტენციურ სისტემაში, დახურულ დაწესებულებებში საზოგადოებრივი კონტროლის მექანიზმმები უნდა გაძლიერდეს", - აღნიშნა ჯანეზაშვილმა.
სასჯელაღსრულების ახალი მინისტრი არასამთავრობო სექტორის წარმომადგენლებს ხვდება. შეხვედრა სამინისტროში, მედიისთვის დახურულ ფორმატში მიმდინარეობს და არასამთავრობო სექტორის რამდენიმე ათეული წარმომადგენელი ესწრება.
