თბილისის მუნიციპალიტეტის საკრებულოს სპორტისა და ახალგაზრდობის კომისიის თავმჯდომარემ ქეთევან ჯოხაძემ ,,ბარსელონა’’ ,,სევილიას’’ შორის უეფას სუპერთასის მატჩზე დასასწრებ ბილეთებთან დაკავშირებით, განმარტება გააკეთა.როგორც დეპუტატმა აღნიშნა, დედაქალაქის მუნიციპალიტეტის საკრებულომ საქართველოს ფეხბურთის ფედერაციის პრეზიდენტს მატჩზე დასასწრები ბილეთები სოციალურად დაუცველი ოჯახებისთვის სთხოვა.
მისივე ინფორმაციით, აღნიშნული ბილეთების შეძენას მაჟორიტარი დეპუტატები მათივე სამაჟორიტარო ოლქში მცხოვრები სოციალურად დაუცველი ბავშვებისთვის საკუთარი სახსრებით აპირებდნენ.
,,საფეხბურთო მატჩზე დასასწრები ბილეთების ელექრონულ გაყიდვებთან დაკავშირებული პრობლემების გამო, საკრებულომ ფეხბურთის ფედერაციას წერილობით მიმართა, თუმცა, პასუხი მათგან დღემდე არ მიგვიღია. რაც შეეხება საკრებულოს დეპუტატებს, მათთვის ბილეთების გარკვეული რაოდენობა მსგავს მატჩებზე მთავრობისა და სახელმწიფო უწყებებისთვის განსაზღვრული ე.წ."კორპორატიული ბილეთებიდან " გამოიყოფა’’,-განაცხადა ქეთევან ჯოხაძემ.
თბილისის საკრებულომ ფეხბურთის ფედერაციას უეფას სუპერთასზე დასასწრები 300 ბილეთის გამოყოფა სთხოვა. ამის შესახებ, ინფორმაციას ,,ნაცმოძრაობის” წევრი ნიკა მელია ავრცელებს და თბილისის საკრებულოს თავმჯდომარის გიორგი ალიბეგაშვილის 26 ივნისით დათარიღებულ წერილს ასაჯაროვებს.
,,ბატონო ზვიად, გთხოვთ, ბარსელონასა და სევილიას შორის უეფას სუპერთასის მატჩზე დასასწრებად, რომელიც ტარდება თბილისში 11 აგვისტოს, თბილისის საკრებულოსთვის გამოყოთ: 75-ლარიანი ბილეთი - 100 ცალი; 35-ლარიანი ბილეთი - 100 ლარი; 18-ლარიანი ბილეთი - 100 ცალი. ანაზღაურება მოხდება ნაღდი ანგარიშსწორებით", - ნათქვამია საკრებულოს თავმჯდომარის წერილში.
