ბათუმის მერიამ ის ჯიხურები, რომელიც ადრე ბათუმის საბაგიროსთან იდგა და ძირითადად სუვენირებით ვაჭრობა ხდებოდა, ჭაჭის თაუერის მიმდებარე ტერიტორიაზე განათავსა. როგორც ირკვევა, 2015 წლის ტურისტულ სეზონს, ჭაჭის თაუერი გარემოვაჭრეების მიერ კუსტარულად აწყობილი ჯიხურებით გაატარებს.
ბათუმის მერიაში ,,ჯი-ეიჩ-ენს” განუმარტეს, რომ ეს, 20-მდე ასეთი ჯიხურისთვის, დროებითი ლოკაციაა და მომავალი წლისთვის აღნიშნულ ტერიტორიაზე მერია თანამედროვე დიზაინის ჯიხურების განთავსებას უზრუნველყოფს. მერიაში აცხადებენ, რომ 2016 წლის ტურისტული სეზონის დაწყებამდე, აღნიშნულ ტერიტორიაზე ახალი ჯიხურები განთავსდება, სადაც მოვაჭრეებს სუვენირების რეალიზაცია შეეძლებათ.
ბათუმის მერიის ზედამხედველობის სამსახურში აცხადებენ, რომ ამ ჯიხურების აღება რამდენიმე ადგილიდან მოხდა და გარემოვაჭრებთან შეთანხმებით, მერის ხარჯებით, ჭაჭის თაუერის მიმდებარე ტერიტორიაზე განლაგდა. მერიაში პირობას დებენ, რომ ტერიტორიას კეთილმოაწყობენ და ვაჭრობისათვის უფრო ხელსაყრელ პირობებს შექმნიან.
ბათუმის მერიაში პირობას დებენ, რომ ახალი ჯიხურების განთავსების შემდეგ, გარემოვაჭრეებისათვის გადასახადი მაღალი არ იქნება და ისინი კვლავინდებულად გააგრძელებენ ახალ ჯიხურებში ვაჭრობას.
რამდენიმე დღის უკან გაზეთ ”ბათუმელებში” გამოქვეყნებული ინფორმაციდან ირკვევა, რომ 20 ივნისს, დილით სამუშაოზე მოსულებს ჯიხურები ადგილზე აღარ დახვდათ. როგორც მოვაჭრეები ამბობენ მერია მათ ჯიხურების დადგმის ნებას არ აძლევს და ჯიხურები ამიტომ წაიღეს.
მოვაჭრეები პრობლემის მოსაგვარებლად, იმავე დღეს ისინი ქალაქის მერს, გიორგი ერმაკოვს შეხვდნენ. მერმა გარემოვაჭრეებს ჯიხურების დადგმა ალტერნატიული ადგილზე შესთავაზა.
„გოგებაშვილის ქუჩაზე ეს ხალხი უკანონოდ ვაჭრობდა, ხელშეკრულება არ ჰქონდათ. ხელი ეშლებოდათ ფეხით გამვლელებს, ზონა იყო უსახური“, - უთხრა „ბათუმელებს“ გიორგი ერმაკოვმა.„ყველაფერს უნდა ჰქონდეს კანონიერი ფორმა. ჩვენ მათ ხელს შევუწყობთ. იქ [საზღვაო ნავსადგურიდან გოგებაშვილის ქუჩის მონაკვეთი რუსთაველის ქუჩამდე] ჩამწკრივდება ჯიხურები და ყველა გარემოვაჭრე იქნება ერთნაირ პირობებში“. გარემოვაჭრეები შიშობენ, რომ ეს ადგილი მათთვის მომგებიანი არ იქნება, რადგან ტურისტები ნაკლებად დადიან.