შესაძლოა, გმირთა მოედანზე - გადარჩენის სიმბოლოდ,, ჰიპოპოტამის ფიგურა დაიდგას. აღნიშნული მოთხოვნით, პეტიცია მომზადდა, რომელსაც უკვე 500-ზე მეტი ხელმომწერი ჰყავს.
„თბილისში დატრიალებული სტიქიური უბედურების დროს ძალიან ბევრი ჩვენთაგანისთვის საოცრად შთამბეჭდავ სანახაობად იქცა სრულიად სიურეალისტური სურათი – გმირთა მოედანზე ჰიპოპოტამის გამოჩენა. ჩვენი ჰიპო – დინჯი, მშვიდი, უჩვეულო, კეთილად აოცებდა და ღიმილს გვრიდა სტიქიისგან დაზაფრულ ადამიანებს. როგორც აღმოჩნდა, ბევრი ჩვენთაგანისთვის ჩვენი ჰიპო ამ დღეს სიკეთის, გადარჩენისა და მომავლის იმედის სიმბოლოდ იქცა“, - აღნიშნულია პეტიციაში.
პეტიციაზე ხელმომწერი მოქალაქეები აცხადებენ, რომ ჰიპოპოტამის გმირთა მოედანზე „მოგზაურობის“ კადრები უცხოური მედიის მრავალმა წარმომადგენელმაც გაავრცელა.
„გაჩნდა იდეა – გმირთა მოედნის მიდამოებში ჰიპოპოტამის ფიგურა დაიდგას, რომელიც თავის თავში ამ დღის უამრავ, განსხვავებულ ემოციას გააერთიანებს და ამავე დროს, დაღუპული ცხოველების გადარჩენილ თანამოძმეს განასახიერებს. თბილისის ჰიპოს ფიგურა სიკეთის, იმედის, გადარჩენის, სიცოცხლის, ცხოველებისადმი ჰუმანური დამოკიდებულების სიმბოლო იქნება“, - ნათქვამია პეტიციაში.
13 ივნისის სტიქიის დროს, ზოოპარკიდან ცხოველების გაქცევისას, ბეჰემოტი ბეგლარი გმირთა მოედანზე აღმოჩნდა, საიდანაც ის კვლავ ზოოპარკში დააბრუნეს.
