საქართველოსა და იორდანიას შორის უახლოეს მომავალში ხელი მოეწერება ორმაგი დაბეგვრის თავიდან აცილების, თავისუფალი ფრენებისა და ვიზის ხელშეწყობის შესახებ ხელშეკრულებებს. ამის შესახებ საქართველოს პრემიერ-მინისტრმა ნიკა გილაურმა იორდანიის დედაქალ ამანში იორდანიელ კოლეგასთან სამირ სიფაის გამართული შეხვედრის შემდეგ განაცხადა.
"შევთანხმდით ასევე, რომ ვიმუშავებთ და უახლოეს თვეებში ხელს მოვაწერთ ორმაგი დაბეგვრის შესახებ ხელშეკრულებას, ვიზის ხელშეწყობის შესახებ ხელშეკრულებას და ასევე თავისუფალი ფრენების შესახებ ხელშეკრულებას. ეს არის ის ძირითადი დოკუმენტები, რომელთა ხელმოწერითაც ჩვენ ორ ქვეყანას შორის ხელს შევუწყობთ ტურიზმის განვითარებას და ასევე ბიზნესმენების თანამშრომლობასა და აქტივობას", _ აცხადებს ნიკა გილაური.
შეგახსენებთ, რომ საქართველოს პრემიერ-მინისტრი ნიკა გილაური სამთავრობო დელეგაციასთან ერთად 26 აპრილს ერთდღიანი ვიზიტით იორდანიაში იმყოფებოდა. ვიზიტის მიზანი საქართველოში ინვესტიციების მოზიდვა და ქართული პროდუქციის ექსპორტი იყო.
