„კიდევ ერთი წელი და უკრაინისგან, ქვეყნისგან, რომელთანაც ვმეგობრობდით, რომელთანაც სავაჭრო ურთიერთობა გვქონდა, სადაც სტუმრად მივდიოდით ნათესავებთან, მხოლოდ მოგონებები დარჩება." ამის შესახებ დიმიტრი მედვედევი ღია წერილში წერს, რომელიც „ნეზავისიმაია გაზეტამ" დღევანდელ ნომერში გამოაქვეყნა. რუსეთის პრემიერ-მინისტრის თქმით, უკრაინას კოლოსალური საგარეო ვალები აქვს და გარდაუვალი დეფოლტი ელის, რაც ქვეყანას სოციალურ-ეკონომიკური კოლაფსის საფრთხეს უქმნის. „კიევს ევროპის დახმარების იმედი არ უნდა ჰქონდეს, რადგანაც ევროპა თავადაც გაჭირვებით ართმევს თავს ეკონომიკურ კრიზისს. ევროკავშირი არ ჩქარობს უკრაინის თანასწორ პარტნიორად აღიარებას. ევროპა უკრაინას საბრალო ლიზას პოზიციაში აყენებს, რომლის პაემნებიც ქორწინებით არასდროს მთავრდება,"-წერს მედვედევი.
