საყდრისის საბადოში სამუშაოების განახლებასთან დაკავშირებით საქართველოს ყოფილმა პრეზიდენტმა განცხადება "ფეისბუკის" საკუთარ გვერდზე გაავრცელა.
მიხეილ სააკაშვილი საყდრისის საბადოზე სამუშაოების განახლებას "ბარბაროსულ აფეთქებას" უწოდებს, რომელიც, მისივე თქმით, "მძიმე დარტყმაა საქართველოს კულტურასა და მსოფლიო მემკვიდრეობაზე".
ყოფილი პრეზიდენტი აცხადებს, რომ ეს გადაწყვეტილება, რომელიც შევარდნაძის ეპოქაშიც კი ვერ მიიღეს, ბიძინა ივანიშვილის ინტერესების შესაბამისად იქნა მიღებული.
"რუსი მფლობელების მოთხოვნას და ვინმე უჩას, ივანიშვილის საყვარელი დეიდაშვილის სიხარბეს შეეწირა ჩვენი ისტორიული სიმდიდრე, რომელსაც საუკუნეების განმავლობაში, ქვეყნისთვის სიმდიდრე და სახელი უნდა მოეტანა, მოეზიდა ტურისტები. ის, რაც შევარდნაძის დროს მამალაძემაც კი ვერ გაბედა და ჩემი პრეზიდენტობის დროს კი, რა თქმა უნდა, საერთოდ წარმოუდგენელი იყო, ერთი ოლიგარქის ახირებამ და მისი ნათესავების მატერიალურმა დაინტერესებამ შეიწირა. თალიბების მიერ კლდეში გამოკვეთილი ბუდების აფეთქების შემდეგ ვერ ვიხსენებ ამ დონის ვანდალიზმს მსოფლიოში. ეს არის პირდაპირი შედეგი კორუფციის, უპასუხისმგებლობისა და უმეცრების, რომელიც ჩვენს ქვეყანაში, სულ უფრო და უფრო იკიდებს ფეხს ყველა მიმართულებით. მოვუწოდებ ყველას, ვისაც ეს ეხება, ახლა მაინც შეაჩერებინონ უკანონო სამუშაოები, რათა ის მაინც გადავარჩინოთ, რისი გადარჩენაც ჯერ კიდევ შესაძლებელია," - ნათქვამია განცხადებაში.
