საქართველოს საგარეო უწყება ცხინვალის დე ფაქტო პრეზიდენტის ლეონიდ თიბილოვის განცხადებას დესტრუქციულს უწოდებს. როგორც საგარეო უწყების პრესსპიკერმა დავით კერესელიძემ ჟურნალისტებთან საკითხის კომენტირებისას განაცხადა აღნიშნულთან დაკავშირებით ქვეყნის პარტნიორები და მოკავშირეები ინფორმირებულები არიან.
„რა თქმა უნდა, ჩვენ ძალიან შეშფოთებით გავეცანით ამ განცხადებას. კიდევ ერთხელ დავაფიქსირებთ იმას, რომ ეს არის აბსოლუტურად დესტრუქციული განცხადება როგორც ცხინვალის დე ფაქტო ხელისუფლების მხრიდან, ასევე რუსეთის მხრიდან რომელიც დარწმუნებული ვარ, კარგადაა გათვითცნობიერებული და მათი ძალისხმევით ხდება ასეთი განცხადებების გაკეთება", _განაცხადა საგარეო საქმეთა სამინისტროში გამართულ პრესკონფერენციაზე კერესელიძემ.
რუსეთსა და ოკუპირებულ სამხრეთ ოსეთს შორის ხელშეკრულების სამუშაო პროექტს პარლამენტი და ოსი საზოგადოება მალე გაეცნობა.
,,მსოფლიოში განვითარებული პოლიტიკური პროცესები იმის აუცილებლობას გვკარნახობს, რომ სამხრეთ ოსეთსა და რუსეთს შორის თანამშრომლობის ახალ ხელშეკრულებას მოვაწეროთ ხელი." - განაცხადა ლეონიდ თიბილოვმა.
მისი თქმით, ამ დროისთვის მომავალ ხელშეკრულებასთან დაკავშირებით უკვე არსებობს მრავალი წინადადება, რომელიც რუს კოლეგებთან კონსულტაციების შედეგად მიიღეს.
მოლაპარაკებები ამ საკითხზე, ძირითადად, ოკუპირებულ სამხრეთ ოსეთში სამუშაო ვიზიტით, ორი დღის წინ ჩასულმა რუსეთის პრეზიდენტის წარმომადგენელმა ოლეგ გოვორუნმა აწარმოა.
,,ჩვენ უკვე შევუდექით ახალ ხელშეკრულებაზე მუშაობას. სამხრეთ ოსეთის მხარის ექსპერტებს რუსეთის მხარის წარმომადგენლებთან ერთად კონსულტაციების გამართვა დაევალათ. მე გამოვედი წინადადებით, რომ ხელშეკრულების ახალ პროექტში განხილული იყოს სამხრეთ ოსეთის შესვლა რუსეთის ფედერაციის ფარგლებში, როგორც პირდაპირი ფორმით, ასევე სხვა გზებითაც, რაც გზებიც დღეს მსოფლიო პრაქტიკაში არსებობს. ვფიქრობ, ამ საკითხზე მალე მივიღებთ სათანადო პასუხს." - აღნიშნა თიბილოვმა
