ვიცე-პრემიერი და ენერგეტიკის მინისტრი კახა კალაძე პრემიერ-მინისტრის ირაკლი ღარიბაშვილის ინიციატივას საინტერესოს უწოდებს. როგორც მთავრობის სხდომის შემდეგ მინისტრმა განაცხადა, მნიშვნელოვანია ის ფაქტიც, რომ შეიქმნება სამუშაო ჯგუფი, რომელიც იმსჯელებს საკითხის როგორც პოზიტიურ, ასევე ნეგატიურ მხარეებზე.
,, პრემიერის ინიციატივა საინტერესოა. მნიშვნელოვანი იქნება შეიქმნას სამუშაო ჯგუფი, რომლიც იმსჯელებს ამ თემაზე. შესაბამისად იქნება დადებული დადებითი, უარყოფითი მხარეები რა შეიძლება იყოს და ამის შემდეგ იქნება იქნება შესაბამისი გადაწყვეტილება", -განაცხადა კალაძემ.
შინაგან საქმეთა სამინისტროს რეფორმირებისა და რეგორგანიზაციის მიზნით, საქართველოს პრემიერ-მინისტრმა ირაკლი ღარიბაშვილმა უსაფრთხოებისა და კრიზისების მართვის საბჭოს მდივანს, დავით სუჯაშვილს სამუშაო ჯგუფის შექმნა დაავალა. პრემიერის ინიციატივით, სამუშაო ჯგუფი, რომლის შემადგენლობაში მთავრობის, პარლამენტის, არასამთავრობო ორგანიზაციის წარმომადგენლები, უცხოელი და ქართველი ექსპერტები შევლენ, შინაგან საქმეთა სამინისტროდან უშიშროების სამსახურის გამოყოფის საკითხზე იმუშავებს. მომზადდება ანალიზი და მაქსიმალურად მოხდება ყველა რისკის გათვლა.
„მთავრობის სხდომაზე განვიხილეთ საკითხი, რომელიც თავის დროზე იყო „ქართული ოცნების" დაპირება-შინაგან საქმეთა სამინისტროს გამოეყოს უსაფრთხოების ბლოკი და მოხდეს შს სამინისტროს რეფორმირება. მე დავავალე უსაფრთხოებისა და კრიზისების მართვის საბჭოს ახალ მდივანს, შექმნას სამუშაო ჯგუფი. ამას სჭირდება კარგი დაგეგმარება, რათა მოხდეს რისკების გათვლა. ბოლო ორი წლის განმავლობაში ჩვენ შეგნებულად არ შევეხეთ ამ საკითხს, რადგან იყო გარდამავალი პერიოდი, იყო გამოწვევები. დღეს არის ის დრო, რომ ჩვენ დავიწყოთ მსჯელობა, შევქმნათ სამუშაო ჯგუფი, რომელიც იქნება აბსოლუტურად გამჭვირვალე, ღია. ყველას მიეცემა საშუალება პროცესში ჩართულობის. დავსხდნენ და ერთად ჩამოვყალიბდეთ, რომელი მოდელი აჯობებს ჩვენს რეალობაში, ქართულ რეალობაში. საქართველოსთვის როგორი მოწყობა იქნება ყველაზე ოპტიმალური. შესაძლოა, შინაგან საქმეთა სამინისტროს უსაფრთხოების ბლოკი გამოეყოს, სადაც სპეცსამსახურები შევლენ და ცალკე იქნება პოლიცია. ეს არის იდეის დონეზე, მაგრამ თუ რა ფორმით განხორციელდება ის, ამაზე სამუშაო ჯგუფი იმსჯელებს,"-განაცხადა პრემიერ-მინისტრმა მთავრობის სხდომის დასრულების შემდეგ.
ირაკლი ღარიბაშვილის განმარტებით, სამუშაო ჯგუფის მიერ შემუშავებულ წინადადებებს განიხილავს მთავრობა და ამის შემდეგ კანონპროექტი დასამტკიცებლად პარლამენტს გადაეგზავნება.