საგარეო საქმეთა პრეს-სპიკერი დავით კერესელიძე ტრადიციულ ბრიფინგზე გერმანიის საგარეო საქმეთა მინისტრის საქართველოში ვიზიტის გამოეხმაურა, რომელსაც პოლიტიკური მხარდაჭერისა და სოლიდარობის დამადასტურებელად მიიჩნევს.
„ჩვენ ამ ვიზიტს ვაფასებთ როგორც პოლიტიკური მხარდაჭერისა და სოლიდარობის დამადასტურებელ ვიზიტს. ამ ვიზიტის ფარგლებში ბატონ მინისტრს ექნება შეხვედრები საქართველოს პრეზიდენტთა, პრემიერ-მინისტრთან, საგარეო საქმეთა მინისტრთან და პარლამენტის თავმჯდომარესთან", - განაცხადა დავით კერესელიძემ.
შეგახსენებთ, რომ დღეს , 8 დეკემბერს საქართველოში გერმანიის საგარეო საქმეთა ფედერალურ მინისტრს ფრანკ-ვალტერ შტაინმაიერს ელოდებიან.
ორდღიანი ვიზიტის ფარგლებში გაიმართება გერმანიის საგარეო საქმეთა მინისტრის შეხვედრები საქართველოს პრეზიდენტთან გიორგი მარგველაშვილთან, პრემიერ-მინისტრთან ირაკლი ღარიბაშვილთან და საგარეო საქმეთა მინისტრთან თამარ ბერუჩაშვილთან.
ეს იქნება მიმდინარე წელს ფედერალური მინისტრის რიგით მეორე ვიზიტი საქართველოში. როგორც ცნობილია, ფრანკ-ვალტერ შტაინმაიერი 2014 წლის აპრილის ბოლოს, ფრანგ კოლეგასთან ლორან ფაბიუსთან ერთად ესტუმრა თბილისს.
