საქართველო მოუწოდებს დასავლეთს, დაგმოს რუსეთსა და აფხაზეთს შორის გაფორმებული ხელშეკრულება, - ამ სათაურით აქვეყნებს გავლენიანი გამოცემა Financial Times-ი საქართველოს პრემიერ-მინისტრ ირაკლი ღარიბაშვილთან ინტერვიუს. როგორც სტატიაშია აღნიშნული, საქართველოს პრემიერ-მინისტრმა რუსეთსა და აფხაზეთს შორის ხელმოწერილ შეთანხმებას მოსკოვის მიერ საქართველოს ამ სეპარატისტული რეგიონის „ანექსიისკენ გადადგმული კიდევ ერთი ნაბიჯი" უწოდა. როგორც ირაკლი ღარიბაშვილმა Financial Times განუცხადა რუსეთის პრეზიდენტის ვლადიმერ პუტინის მიერ ხელმოწერილი შეთანხმება არის რეაქცია იმაზე, რომ საქართველო ცდილობს კიდევ უფრო დაუახლოვდეს ევროპას მას შემდეგ, რაც ივლისში თბილისმა გააფორმა პოლიტიკური და სავაჭრო ხელშეკრულება ევროკავშირთან.
პრემიერს „ეჭვი არ ეპარება", რომ მოსკოვი ამზადებს ასეთივე ხელშეკრულებას სამხრეთ ოსეთისათვისაც (საქართველოს კიდევ ერთი სეპარატისტული რეგიონი), რომელიც, აფხაზეთის მსგავსად, ოკუპირებულია რუსეთის მიერ საქართველოსთან 2008 წლის ომის შემდეგ.
ღარიბაშვილი Financial Times-სთან ინტერვიუში განმარტავს, რომ დასავლელმა ლიდერებმა უნდა გამართონ „პირდაპირი დიალოგი" პუტინთან, რათა წერტილი დაესვას კრიზისს უკრაინაში, რადგან მხოლოდ სანქციებით სიტუაციის მოგვარება შეუძლებელია.
„ჩვენ ვახორციელებთ საერთაშორისო თანამეგობრობის მობილიზებას, რათა რუსეთის ხელისუფლების ეს ქმედება დაგმობილ იქნეს, - განაცხადა ღარიბაშვილმა აფხაზეთთან ორშაბათს ხელმოწერილ ხელშეკრულებასთან დაკავშირებით.