დღეს, 10 სექტემბერს, თბილისის მერიაში გამართულ სამუშაო შეხვედრაზე მოსახლეობის საყოველთაო აღწერის მოსამზადებელი სამუშაოების შესახებ იმსჯელეს. ინფორმაცია საველე სამუშაოების და საყოველთაო აღწერის პროცედურების შესახებ დედაქალაქის მთავრობის წევრებს საქართველოს სტატისტიკის ეროვნული სამსახურის თბილისის სტატისტიკის ბიუროს ხელმძღვანელმა ირაკლი კახიძემ გააცნო. მისი თქმით, საველე სამუშაოებისთვის უკვე შერჩეულია 2 500 ადამიანი. აღწერა მიმდინარე წლის 5 ნოემბრიდან 19 ნოემბრის ჩათვლით ჩატარდება. როგორც მთავრობის დღევანდელ სხდომაზე თბილისის მერმა დავით ნარმანიამ განაცხადა, დედაქალაქის მერია ვალდებულია ხელი შეუწყოს „საქსტატს" აღწერის ჩატარებაში, რაც სტატისტიკის ეროვნული სამსახურის მატერიალურ-ტექნიკური ბაზით უზრუნველყოფას, კერძოდ, გამგეობებში სამუშაო ფართის და ტრანსპორტის გამოყოფას გულისხმობს. მისივე თქმით, დედაქალაქის მუნიციპალიტეტის პოლიტიკის განსაზღვრისას, თბილისის მთავრობას მნიშვნელოვნად დაეხმარება საყოველთაო აღწერის შემდეგ მოპოვებული ზუსტი სტატისტიკა თბილისში მოსახლეობის რაოდენობის, სტატუსის და ადგილმდებარეობის შესახებ.