საქართველოს სახალხო დამცველი მიესალმება საქართველოში საკონსტიტუციო და იურიდიული რეფორმებისა და ადამიანის უფლებათა საკითხებში ევროკავშირის სპეციალური მრჩევლის თომას ჰამარბერგის მიერ მომზადებულ დასკვნითი რეკომენდაციების გამოქვეყნებას.
სახალხო დამცველის აპარატის ინფორმაციით, რეკომენდაციები შეეხება ყველა იმ მნიშვნელოვან საკითხს, რაც სახალხო დამცველის შეფასებით ქვეყანაში ადამიანის უფლებების დაცვის, კანონის უზენაესობის და ქვეყნის დემოკრატიული განვითარებისათვის არსებითი მნიშვნელობისაა: ადამიანის უფლებების ეროვნული სტრატეგიისა და სამოქმედო გეგმის განუხრელი შესრულება და მონიტორინგი, სასამართლო ხელისუფლების დამოუკიდებლობის გაზრდა, მათ შორის ინდივიდუალურ მოსამართლეთა როლის გაძლიერება, სამართალდამცავი სტრუქტურების, მათ შორის, პროკურატურის სისტემაში პროფესიონალიზმის გაზრდა, საჩივრების განხილვის დამოუკიდებელი და ეფექტური მექანიზმის შექმნა, წინა წლებში ჩადენილი ადამიანის უფლებების დარღვევის ფაქტების გამოძიება, მათ შორის, დაზარალებულთა კომპენსაცია, ყველა სახის ძალადობის წინააღმდეგ სახელმწიფო კამპანიის წამოწყება, მოწყვლადი ჯგუფების უფლებების დაცვის გაძლიერება, შრომის უსაფრთხოების მონიტორინგის ინსპექციის შექმნა და სხვა. მნიშვნელოვანია ისიც, რომ აღნიშნული საკითხები შესულია საქართველოს სახალხო დამცველის 2013 წლის საპარლამენტო ანგარიშში და სახელმწიფოს შესაბამისი უწყებებისადმი არსებობს სახალხო დამცველის რეკომენდაციები.
ევროკავშირის სპეციალური მრჩევლის, თომას ჰამარბერგის მოღვაწეობა საქართველოში განსაკუთრებულად მნიშვნელოვანი იყო. მისი ანგარიში საქართველო გარდამავალ პერიოდში, ისევე როგორც დასკვნითი რეკომენდაციები უნდა იყოს საქართველოს ხელისუფლების ყველა შტოსათვის სახელმძღვანელო დოკუმენტი. საქართველოს სახალხო დამცველი იმედოვნებს, რომ ამ დოკუმენტებში მოყვანილი რეკომენდაციების შესრულება იქნება საქართველოს ხელისუფლების ერთ-ერთი მთავარი საკითხი დღის წესრიგში, რაც ხელს შეუწყობს კანონის უზენაესობისა და ადამიანის უფლებათა დაცვის განმტკიცებას ქვეყანაში.
თომას ჰამარბერგის მისიის განხორციელება საქართველოში შესაძლებელი გახდა ევროკავშირის პროექტის „საქართველოს სახალხო დამცველის აპარატის ხელშეწყობა" მხარდაჭერით.
