ჟენევის საერთაშორისო მოლაპარაკებების მორიგ რაუნდზე დევნილების საკითხის განხილვა სავარაუდოდ გართულდება. ამის შესახებ ნათქვამია რუსეთის საგარეო საქმეთა სამინისტროს მიერ გავრცელებულ განცხადებაში, რომელიც ჟენევის საერთაშორისო მოლაპარაკებების მორიგ რაუნდს ეძღვნება.
რუსული მხარე აკონკრეტებს, რომ დევნილების შესახებ საკითხის განხილვას გაეროს გენერალურ ასამბლეაზე მიღებული რეზოლუცია შეუშლის ხელს.
„გაეროს გენერალურ ასამბლეაზე ხმის მიცემა ქართული პოლიტიზირებული რეზოლუციის მიხედვით წარიმართა. ისევე როგორც წინა წლებში რეზოლუციის ქართული პროექტი ვერ ასახავს თანამედროვე ჰუმანიტარულ სიტუაციას რეგიონში, ვერც შექმნილ რეალობებსა და მეზობელი სახელმწიფოების ინტერესებს", - ნათქვამია ლავროვის უწყების მიერ გავრცელებულ განცხადებაში.
ამას გარდა, განცხადების მიხედვით, ჟენევის მოლაპარაკებებზე, უსაფრთხოების ჯგუფში საკითხთა ფართო სპექტრის განხილვა გაიმართება - აფხაზეთისა და ე.წ. სამხრეთ ოსეთის საზღვრებთან არსებული საველე სიტუაციიდან დაწყებული, რეგიონში მშვიდობისა და სტაბილურობის გარანტიით დასრულებული.
„გაგრძელდება მუშაობა ერთობლივი განცხადების პროექტზე ძალის გამოუყენებლობის შესახებ, რასაც აფხაზეთისა და სამხრეთ ოსეთის უსაფრთხოებისათვის უპირველესი ხასიათი აქვს", - ნათქვამია განცხადებაში და იქვე აღნიშნულია, რომ ჟენევის მოლაპარაკებებზე საუბარი ე.წ. საზღვრის ე.წ. დელიმიტაციასაც შეეხება.
„გაანალიზებული იქნება ინციდენტების პრევენციისა და მათზე რეაგირების სამუშაო ჯგუფების საქმიანობა სამხრეთ ოსეთ-საქართველოს საზღვარზე, მათ შორის სახელმწიფოთაშორისი საზღვრების აუცილებელი დელიმიტაციის საკითხი. განხილული იქნება ანალოგიური ნდობის ინსტრუმენტის აღდგენა საქართველოსა და აფხაზეთის რესპუბლიკის საზღვარზეც", - ნათქვამია განცხადებაში.
შეგახსენებთ, რომ ჟენევის საერთაშორისო მოლაპარაკებები 18 ივნისს უნდა გაიმართოს.
