საგარეო უწყების ხელმძღვანელის მაია ფანჯიკიძის განცხადებით, დასაფასებელია გაერთიანებული სამეფოს მხარდაჭერა საქართველო სუვერენიტეტისა და ტერიტორიული მთლიანობისადმი. ამის შესახებ, ფანჯიკიძემ დიდი ბრიტანეთის საგარეო საქმეთა მინისტრ უილიამ ჰეიგთან ერთად გამართულ პრესკონფერენციაზე განაცხადა. ფანჯიკიძემ ბრიტანელ კოლეგას ისტორიულ მომენტში საქართველოში ვიზიტისთვის მადლობა გადაუხადა.
,,განსაკუთრებით დასაფასებელია გაერთიანებული სამეფოს ძლიერი მხარდაჭერა საქართველო სუვერენიტეტისა და ტერიტორიული მთლიანობისადმი მის საერთაშორისოდ აღიარებულ საზღვრებში. მადლიერები ვართ ბრიტანელი დამკვირვებლების ევროკავშირის სადამკვირვებლო მისიაში, რომელიც საერთაშორისო მონიტორინგის ერთადერთი მექანიზმია რუსეთის მხრიდან საოკუპაციო ხაზის გასწვრივ გამუდმებული პროვოკაციების პირობებში", _განაცხადა ფანჯიკიძემ.
ფანჯიკიძემ იმედი გამოთქვა, რომ დიდი ბრიტანეთის მხარდაჭერით საქართველო ევროპას უფრო დაუახლოვდება.
,,გამოვთქვამთ რწმენას, რომ გაერთიანებული სამეფოს მხარდაჭერით შევძლებთ კონკრეტული შედეგების მიღწევას ევროპასთან შემდგომი დაახლოების პროცესში", _განაცხადა მაია ფანჯიკიძემ.
