თბილისი პირდაპირ საჰაერო მიმოსვლას ევროკავშირის წევრი ქვეყნების სხვა ქალაქებთანაც დაიწყებს. საავიაციო მიმოსვლის შესახებ საქართველო-ევროკავშირს შორის შეთანხმება უკვე მიღწეულია.
როგორც ბრიუსელში ვიზიტით მყოფმა საქართველოს პრემიერ-მინისტრმა ნიკოლოზ გილაურმა განაცხადა, შესაბამის ხელშეკრულებას ხელი ივნისში მოეწერება.
"საავიაციო შეთანხმება მნიშვნელოვანია, რადგან თუ თბილისში დღეს მხოლოდ რამდენიმე ევროპული ავიაკომპანია დაფრინავს და თუ ჩვენს დედაქალაქს პირდაპირი მიმოსვლა მხოლოდ რამდენიმე ქალაქთან აქვს, ამ ხელშეკრულების გაფორმების შემდეგ საქართველოში ფრენა ყველა ევროპულ ავიაკომპანიას შეეძლება, თბილისი კი პირდაპირი ფრენებით უფრო მეტ ქვეყანას დაუკავშირდება", - განაცხადა გილაურმა.
მისი განმარტებით, აღნიშნული ხელშეკრულება საქართველოში ტურისტების რაოდენობას გაზრდის.
