ევროპის საბჭოს ეგიდით, უკრაინისთვის საჩივრების საერთაშორისო კომისია დაფუძნდა.
კონვენციას, რომელიც აფუძნებს უკრაინისთვის საჩივრების საერთაშორისო კომისიას, საქართველოს მხრიდან ხელი მოაწერა საგარეო საქმეთა მინისტრმა, მაკა ბოჭორიშვილმა.
დიპლომატიურ კონფერენციას 50 ქვეყნის ლიდერი და მაღალი დონის წარმომადგენელი დაესწრო, მათ შორის უკრაინის პრეზიდენტი, ვოლოდიმირ ზელენსკი, მოლდოვის პრეზიდენტი, მაია სანდუ, და ნიდერლანდების პრემიერ-მინისტრი, დიკ სჰოფი.
„საერთაშორისო სამართლის თანახმად, სახელმწიფო, რომელმაც ჩაიდინა საერთაშორისოდ აღიარებული უკანონო ქმედება, ვალდებულია სრულად აანაზღაუროს ამ ქმედებით მიყენებული ზიანი.
სამართლიანობა და რეპარაციები აუცილებელია მსხვერპლთათვის, რათა გადალახონ მათ მიერ განცდილი შედეგები...
ევროპის საბჭო სწორედ ასეთ ყოვლისმომცველ კომპენსაციის მექანიზმზე მუშაობს, როგორც ეს 2023 წლის რეიკიავიკის სამიტის დეკლარაციაში იყო ხაზგასმული.
ეს მოიცავს, მექანიზმის პირველ კომპონენტად, უკრაინისთვის უკვე შექმნილ დანაკარგების რეესტრს, რომელიც ფუნქციონირებს და რომელმაც 60 000-ზე მეტი განაცხადი მიიღო, მეორე კომპონენტად განაცხადების განხილვის საერთაშორისო კომისიას და სამომავლო მესამე ეტაპად კომპენსაციის ფონდს“, - ნათქვამია ევროპის საბჭოს განცხადებაში.
კონფერენციაზე სიტყვით გამოსვლისას ზელენსკიმ განაცხადა, რომ ომი, და მისთვის რუსეთის პასუხისმგებლობა, ცხადი მაგალითი უნდა გახდეს - რათა სხვებმა ისწავლონ აგრესიის არარჩევა.
“მოველით, რომ ზიანისა და სარჩლების რეესტრიდან კომპენსაციისთვის ყოველი მექანიზმიდან რეალურ გადასახადებამდე - დაიწყებს მუშაობას და ძლიერ და საკმარის საერთაშორისო მხარდაჭერას მიიღებს, რათა ხალხმა ნამდვილად შეძლოს შეგრძნება, რომ ომით გამოწვეული ნებისმიერი ზიანი შეიძლება ანაზღაურებულ იქნას. ეს ომი, და მისთვის რუსეთის პასუხისმგებლობა, ცხადი მაგალითი უნდა გახდეს - რათა სხვებმა ისწავლონ აგრესიის არარჩევა”, - განაცხადა ზელენსკიმ სიტყვით გამოსვლისას.
