რუსეთის პრეზიდენტის, ვლადიმერ პუტინის ქმედებების ერთ-ერთი მიზეზია 1940-იან წლებში ბალტიისპირეთის ქვეყნების ოკუპაციისთვის, საბჭოთა კავშირისა და მისი მემკვიდრის რუსეთის დაუსჯელობა, – ამის შესახებ ლიეტუვის საგარეო საქმეთა მინისტრმა, კესტუტის ბუდრისმა ჰააგაში, დიპლომატიურ კონფერენციაზე სიტყვით გამოსვლის დროს განაცხადა.
„დანაშაულების უარყოფამ და დაუსჯელობამ შთააგონა რუსეთი, ჩაედინა აგრესია საქართველოს წინააღმდეგ 2008 წელს, უკრაინის წინააღმდეგ 2014 წელს და შემდეგ 2022 წელს“, - თქვა მან.
ბადრისმა ხაზი გაუსვა რუსეთზე პასუხისმგებლობის დაკისრების მნიშვნელობას, რადგან მისი თქმით, ეს სტაბილური მშვიდობის დამყარების აუცილებელი პირობაა.
მან ასევე ხაზი გაუსვა უკრაინისთვის საჩივრების საერთაშორისო კომისიაზე ხელმომწერთა წრის გაფართოებისა და „ამ პროცესში ყველა შესაბამისი სახელმწიფოს ჩართვის“ აუცილებლობას.
„ჩვენი ისტორია გვასწავლის, თუ რამდენად მნიშვნელოვანია საერთაშორისო დანაშაულებისთვის რეპარაციები და პასუხისმგებლობა. იმ დროს მოლოტოვ-რიბენტროპის პაქტის ფარგლებში, ლიეტუვისა და ბალტიის სხვა ქვეყნების საბჭოთა ოკუპაციისთვის რეპარაციები არ არსებობდა. ახლა კი პუტინი და მისი რეჟიმი ისე იქცევიან, თითქოს ეს დანაშაულები არასდროს მომხდარა“, – განაცხადა ლიეტუვის საგარეო საქმეთა მინისტრმა.
მინისტრის თქმით, უკრაინასთან დაკავშირებით ასეთი მექანიზმის შექმნა რუსეთს სიგნალს გაუგზავნის, რომ აგრესიას საერთაშორისო საზოგადოება არასოდეს დააკანონებს და ამას აუცილებლად მოჰყვება პასუხისმგებლობა და სამართლიანობა.
