აფხაზეთის ლეგიტიმური მთავრობის უკვე ყოფილი მინისტრი დალილა ხორავა გია ბარამიას წინააღმდეგ სარჩელს ამზადებს. როგორც ხორავამ "ჯი-ეიჩ-ენს" განუცხადა, სარჩელით ის აფხაზეთის მთავრობის თავმჯდომარის 12 მარტის განკარგულების გაუქმებას მოითხოვს, რომლის მიხედვითაც ხორავას თანამდებობიდან გათავისუფლება მოხდა.
"გია ბარამიამ ჩემი თანამდებობიდან გათავისუფლების გადაწყვეტილება იმის გამო მიიღო, რომ იმ უსამართლო და კრიმინალურ საქმიანობაში ვერ ჩამითრია, რომელსაც ეწევა, თუმცა უნდა ვაღიარო, ბევრი ეცადა", - განუცხადა ხორავამ "ჯი-ეიჩ-ენს", თუმცა არ განუმარტავს რა ინფორმაცია აქვს აფხაზეთის ლეგიტიმური მთავრობის თავმჯდომარის კრიმინალური საქმიანობის შესახებ.
"ამას სასამართლოში ვიტყვი", - განმარტა "ჯი-ეიჩ-ენთან" საუბარში ხორავამ.
შეგახსენებთ, რომ აფხაზეთის ლეგიტიმური მთავრობის ჯანდაცვის მინისტრი დალილა ხორავა თანამდებობიდან გაათავისუფლეს. შესაბამისი გადაწყვეტილება აფხაზეთის მთავრობის თავმჯდომარე გია ბარამიამ 12 მარტს მიიღო. ბარამიას შესაბამის განკარგულებაში აღნიშნულის მიზეზად კონტროლის პალატის 2007 წლის ანგარიშია დასახელებული, რომელშიც სხვადასხვა სახის საბიუჯეტო გარღვევებზეა საუბარი. აღნიშნულს არ ეთანხმება თავად ხორავა და აცხადებს, რომ 2007 წლის ჯანდაცვის უწყების ბიუჯეტი "პოზიტიური იყო".
ხორავა აფხაზეთის ლეგიტიმური მთავრობის ჯანდაცვის მინისტრის პოსტზე 2006 წლიდან მუშაობდა.
