პროევროპულ საპროტესტო აქციების დროს სისხლის სამართლის წესით დაკავებული საბა სხვიტარიძის საქმეზე განაჩენი 3 სექტემბერს გამოცხადდება.
განაჩენს მოსამართლე ჯვებე ნაჭყებია გამოაცხადებს სხდომაზე, რომელიც 3 სექტემბერს, 10:30 საათზე ჩაინიშნა.
შეგახსენებთ, 24 ივლისს საბა სხვიტარიძეს, რომელიც პოლიციელ მირიან ქავთარაძეზე თავდასხმაში იყო ბრალდებული, პოლიციელზე თავდასხმის ბრალდება გადაუკვალიფიცირდა.
შუამდგომლობა პროკურატურამ 24 ივლისის პროცესზე დააყენა, რაც სასამართლომ დააკმაყოფილა.
პროკურორ როინ ხინთიბიძის თქმით, საბა სხვიტარიძემ არ იცოდა, რომ მირიან ქავთარაძე პოლიციელი იყო.
საბა სხვიტარიძეს ბრალი ჰქონდა წაყენებული 353-ე პრიმა მუხლის მეორე ნაწილით, რაც პოლიციელზე თავდასხმას გულისხმობს. აღნიშნული მუხლი მას ახლა 120-ე მუხლით გადაუკვალიფიცირდა, რაც ზოგადად ჯანმრთელობის განზრახ მსუბუქ დაზიანებას გულისხმობს. აღნიშნული მუხლით გათვალისწინებული დანაშაული კი "ისჯება ჯარიმით ან გამასწორებელი სამუშაოთი ვადით ექვს თვემდე ან შინაპატიმრობით ვადით ექვსი თვიდან ორ წლამდე ანდა თავისუფლების აღკვეთით ვადით ერთიდან სამ წლამდე, იარაღთან დაკავშირებული უფლებების შეზღუდვით ან უამისოდ".
