„ნაციონალური მოძრაობა" შინაგან საქმეთა სამინისტროს მიერ გამოქვეყნებულ კრიმინალური შემთხვევის სტატისტიკასთან დაკავშირებით განცხადებას ავრცელებს. როგორც დღეს გამართულ ბრიფინგზე პარტიის ერთ-ერთმა ლიდერმა დავით საყვარელიძემ განაცხადა, 2013 წლის სექტემბრის შემდეგ შინაგან საქმეთა სამინისტრომ რამოდენიმეჯერ გამოაქვეყნა დანაშაულის სტატისტიკა და განაცხადა, რომ თითქოსდა კრიმინალური მდგომარეობა ქვეყანაში მკვეთრად გაუმჯობესდა
„სამინისტროს მიერ გამოქვეყნებული მონაცემებით, 2013 წელს დანაშაულთა წლიური ციფრი 28 970, რაც გასული წლის ანალოგიურ მაჩვენებელთან შედარებით 10 036 (25,7%) ნაკლებია.
უნდა აღინიშნოს, რომ ნაციონალური მოძრაობა თავიდანვე ეჭვს გამოთქვამდა ამ მონაცემების სისწორისა და სისრულის გამო და ჩვენი ეჭვები ემყარებოდა შემდეგ ლოგიკას.
თუ გადავხედავთ 2012 წლის დანაშაულის იმ პერიოდების სტატისტიკას, რომელიც შს სამინისტრომ საჯარო გახადა, სურათი შემდეგია:
იანვარი-თებერვალი: სულ 6566, თვეში 3283; იანვარი-აგვისტო: სულ 24460, თვეში 3057;
იანვარი-ოქტომბერი: სულ 31330, თვეში 3133; იანვარი-დეკემბერი: სულ 39050, თვეში 3254.
ნათელია, რომ 2012 წლის განმავლობაში თვეში ჩადენილ დანაშაულთა რაოდენობა 3057-3,254 ვარირებს და დიდ ამოვარდნებს ადგილი არ ქონდა"- აცხადებს საყვარელიძე.
მისივე ინფორმაციით, ანალოგიური სიტუაციაა 2013 წლის მარტამდე, რა დროსაც „ნეტგაზეთმა" გამოაქვეყნა შსს-ს მიერ მიწოდებული ბოლო ოფიციალური დეტალური მონაცემი და ამ მონაცემების მიხედვით 2013 წლის იანვარში დაფიქსირებული იყო 3,906 ფაქტი, რაც 19,6% აღემატებოდა 2012 წლის მონაცემს.
„2013 წლის თებერვალში დანაშაულთა რაოდენობა ოდნავ შემცირდა და შეადგინა 3 819, თუმცა აღნიშნული ციფრიც 15.7%-ით მეტი იყო 2012 წლის თებერვალში რეგისტრირებულ დანაშაულზე. შესაბამისად ირკვევა, რომ 2013 წლის იანვარ-თებერვალის თვეებში დანაშაულის საშუალო მაჩვენებელი 3,862 ერთეულს შეადგენდა.
„ტაბულას" მიერ შინაგან საქმეთა სამინისტროდან გამოთხოვილი მოპოვებული ინფორმაციის მიხედვით, 2013 წლის იანვარ-აგვისტოში საქართველოში 28,822 დანაშაული დარეგისტრირდა ანუ საშუალოდ თვეში 3,602. როგორც ვხედავთ შედეგი ლოგიკურად ჯდება საერთო სურათში, ვინაიდან ანალოგიურად 2012 წლის თებერვლიდან აგვისტომდე შეიმჩნეოდა ფაქტების შემცირება, თუმცა 2013 წლის მონაცემი მაინც აღემატებოდა 2012 მონაცემებს.
საბოლოო ჯამში შინაგან საქმეთა სამინისტროს ოფიციალური მონაცემებით 28 970 შემთხვევა დაფიქსირდა, ანუ თვეში საშუალოდ 2,342 დანაშაული. ამ წლიურ მაჩვენებელს იანვარ-თებერვლის დანაშაულთა რიცხვი (7,725) რომ გამოვაკლოთ მივიღებთ, რომ მარტ-დეკემბერში ჩადენილ დანაშაულების რაოდენობა 21 245-ს შეადგენდა, (თვეში საშუალო მაჩვენებელი 2,245), რაც 1,732 და 1,617 ერთეულით ნაკლებია შესაბამისად წინა წლის და 2013 წლის საწყისი ორი თვის საშუალო მაჩვენებელთან მიმართებაში. ხოლო თუ წლიურ ოფიციალურ მონაცემებს აგვისტოს არაოფიცილურ მონაცემებთან შევადარებთ მივიღებთ, რომ სექტემბერ-დეკემბრის პერიოდში ოთხი თვის განმავლობაში ჩადენილი იყო მხოლოდ 148 დანაშაული. რაც ცოტა დაუჯერებელია"_ აცხადებს საყვარელიძე.
