აფხაზეთის ავტონომიური რესპუბლკის მთავრობის თავმჯდომარემ გიორგი ბარამიამ დღეს გამართულ პრესკომფერენციაზე აფხაზეთში ე.წ საპრეზიდენტო არჩევნების შედეგები შეაფასა და განაცხადა, რომ გალის რაიონში რუსეთის უშიშროების სპეცსამსახურებია შეყვანილი.
ბარამიას განცხადებით, მათი შეყვანის მიზანი იმ მაცხოვრებლების მიმართ სადამსჯელო ღონისძიებების გატარებაა, რომლებმაც ე.წ. საპრეზიდენტო არჩევნებში მონაწილეობა არ მიიღეს.
როგორც აფხაზეთის მთავრობის თავმჯდომარემ აღნიშნა, გალში რუსეთის უშიშროების სპეცსამსახურის 600-მდე ჯარისკაცია მობილიზებული. მისივე თქმით, აფხაზეთის ტერიტორიაზე რუსეთის საოკუპაციო ძალები და დე-ფაქტო შსს-ს საგანგებო მდგომარეობაში მუშაობენ, რათა არჩევნების გაყალბების გამო ოპოზიციის უკმაყოფილება სერიოზულ დაპირისპირებაში არ გადაიზარდოს.
აფხაზეთის ავტონომიური რესპუბლიკის მთავრობის თავმჯდომარე, გიორგი ბარამია ე.წ. არჩევნებში სერგეი ბაღაფშის გამარჯვებას აფხაზი ხალხისთვის კიდევ ერთ უკან გადადგმულ ნაბიჯად შეაფასა.
,,კრემლის მიერ ბაღაბშის ხელმეორედ გაპრეზიდენტება არათუ ემსახურება აფხაზი ხალხის ინტერესებს, არამედ პირდაპირ მათ წინააღმდეგაა მიმართული. აფხაზი ხალხი უკვე წლებია უკეთესობის მოლოდინში ცხოვრობს და მათთვის მთავრობაში ბაღაფშის მარიონეტული გუნდის ხელახლა მოსვლა იმედგაცრუება იქნება."- განაცხადა გიორგი ბარამიამ.