ანგარიში თავად სახალხო დამცველმა წარმოადგინა და როგოც ტუღუშმა აღნიშნა, აქციების დროს მომხდარი სამართალდარღვევის ფაქტები ასახულია ანგარიშში. ეს ეხება როგორც 6 მაისის ფაქტს, ასევე 15 ივნისს შსს-ს წინ მომხდარ ინცინდენტს.

გიორგი ტუღუში მთავარ პროკურატურას ამ ფაქტების სასწრაფო და გამჭვირვალე გამოძიებას თხოვს. ასევე მთავარ პროკურატურას მოუწოდებს უზრუნველყოს სწრაფი და გამჭვირვალე გამოძიება ყველა იმ სისხლის სამართლის საქმისა რომელიც 2009 წლის 9 აპრილს დაწყებულ აქციებს და შემდგომ პროცესებს უკავშირდება.

როგორც ტუღუში აცხადებს, სახალხო დამცველის აპარატის მიერ განხორციელებული მონიტორინგისა და შემოსული განცხადებების შესწავლის შედეგად დაფიქსირდა რამდენიმე ათეული ფაქტი, როდესაც პირები აცხადებდნენ, რომ მათ ფიზიკური შეურაცხყოფა აქციებში აქტიური მონაწილეობის გამო მიაყენეს.

"ეს აქციები საკმაოდ დაძაბულად მიმდინარეობდა და კანონდარღვევები დაფიქსირდა როგორც მომიტინგეთა მიმართ, ასევე მომიტინგეთა მხრიდან. განსაკუთრებით რთულ ვითარებაში უხდებოდათ მუშაობა ჟურნალისტებს. შამწუხაროდ გამოვლინდა მათი ფიზიკური შეურაცხყოფისა და პროფესიული მოვალეობის შესრულებისას ხელის შეშლის ფაქტები, როგორც აქციის მონაწილეთა ასევე სამართალდამცავების მხრიდან", - აცხადებს სახალხო დამცველი და აღნიშნავს, რომ 6 მაისს პოლიციის სამმართველოსთან გამოყენებული ე.წ. არალეტარული იარაღი გამოყენებული იყო უკანონოდ, რადგან ამ იარაღის გამოყენების ნებართვის შესახებ ნორმა კანონში შევიდა ამ ფაქტიდან ორთვენახევრის შემდეგ 17 ივლისს. ამიტომ გიორგი ტუღუში ამ საკანონმდებლო ცვლილებასაც აკრიტიკებს.

"მიუხედავად იმისა, რომ ნამდვილად საჭირო იყო შეკრებებისა და მანიფესტაციების ახლებური რეგულირება, პარლამენტის მიერ 17 ივლისს განხორციელებული საკანონმდებლო ცვლილებები, გარკვეულწილად ეწინააღმდეგება კონსტიტუციასაც და ადამიანის უფელბათა ქარტიასაც", - აცხადებს ტუღუში.

აღსანიშნავია, რომ ამ თემაზე საუბრისას კომიტეტზე დაისვა კითხვა, თუ რატომ არ არის ასახული ანგარიშში პოლიტიკური ლიდერების წინააღმდეგ განხორციელებული ქმედებები ამ აქციების დროს, თუმცა როგორც ტუღუში განმარტავს სახალხო დამცველის აპარატი საკმაო დროის განმავლობაში ამაოდ ითხოვდა ამ პოლიტიკური ლიდერებისაგან დოკუმენტაციას და ეს დოკუმენტაცია წარმოდგენილი იქნა მხოლოდ მაშინ, როდესაც ანგარიში უკვე გაწერილი იყო. შესაბამისად ტუღუში პირობას იძლევა, რომ ეს ფაქტები უკვე შემდგომ ანგარისში აისახება.