ანტისაოკუპაციო აქციების "სირცხვილიას" ორგანიზატორი შოთა დიღმელაშვილი „ფეისბუქზე“შსს-ს ანალიტიკური დეპარტამენტის ყოფილი ხელმძღვანელის, შოთა უტიაშვილის სახლთან მიმდინარე აქციას ეხმიანება.
„თვეზე მეტია, შსს მინისტრის წინააღმდეგ გამოსვლებში ვართ და შიშველი ხელებით მთელი სახელმწიფო რესურსისა თუ ქვეყნის უმდიდრესი ადამიანის დარტყმებს ვიგერიებთ. ჩვენ წინააღმდეგაა მთელი სახელმწიფო აპარატი და ამას გარდა, დაუდეკლარირებელი პოლიტიკური ფულით ნაკვები "კერძო" ტროლქარხნები.
ამ პერიოდის განმავლობაში რამდენჯერმე, ათასობით ადამიანთან ერთად მსვლელობით ავუარეთ გახარიას საცხოვრებელ სახლს და გზად არც გავჩერებულვართ, არც გვიხმაურია, პირიქით, მუსიკას ჩავუწიეთ და ხალხი არ შევაწუხეთ, რადგან გაცეცხლებულებმაც კი კერძოსა და საჯაროს გამიჯვნა ვიცით, პოლიტიკურ მტერსაც კი არ მოვექცევით უღირსად, მით უმეტეს, არ შევაწუხებთ მის ოჯახს, შვილებს.
ჩანს, წესიერება იმდენად შორსაა მთავრობისგან, რომ ვერც სამოქალაქო საზოგადოების მიერ მიცემული მაგალითით სწავლობენ. რაღაც ფბ-პოსტის გამო ეკა კვესიტაძისა და შოთა უტიაშვილის საცხოვრებელი სახლის წინ მიურეკიათ ნახირი და ბღავიან. მართლა #სირცხვილია“,- წერს დიღმელაშვილი.
შოთა უტიაშვილის სახლთან მიმდინარე აქციის მონაწილეები, ითხოვენ შოთა უტიაშვილმა ბოდიში მოიხადოს ფეისბუქზე 24 ივლის დაწერილი სტატუსის გამო, რომელიც აგვისტოს ომსა და რუსეთს ეხება. უტიაშვილი წერდა, რომ 2008 წლის აგვისტოს ომმა, თავისი მინუსებითა და პლუსებით, საქართველოს ამოსუნთქვის საშუალება მისცა.