რუსეთმა საქართველოს საჰაერო სივრცე დაარღვია. ამის შესახებ შიდა ქართლის საინფორმაციო ცენტრს გორის საკრებულოს დეპუატატმა ლია ჩლაჩიძემ განუცხადა. მისი თქმით, დაახლოებით 13:00 საათზე ვერტმფრენმა ჯერ სოფელ ერგნეთს გადაუფრინა, შემდეგ კი სოფელ დიცის მიმართულებით წავიდა.
"მე ერგნეთში ვცხოვრობ. ჩვენსკენ ნიქოზის მხრიდან გამოფრინდა, შემდეგ დიცის მხარეს აიღო მიმართულება", - აცხადებს ლია ჩლაჩიძე.
Qartli.ge ფაქტთან დაკავშირებით სახელმწიფო უსაფრთხოების სამსახურს დაუკავშირდა.
"ვერტმფრენმა ფრენა განახორციელა ოკუპირებულ ტერიტორიაზე. ნებისმიერი ასეთი ქმედება არღვევს ადგილზე არსებულ უსაფრთხოების გარემოს და საკითხი მწვავედ დგება როგორც IPRM-ის, ისე ჟენევის ფორმატებში“, - განუცხადეს Qartli.ge-ს უწყებაში.