ეკონომიკის ყოფილმა მინისტრმა, გიორგი ქობულიამ, გადაცემაში „Forbes კვირა გიორგი ისაკაძესთან ერთად“ ისაუბრა მისი თანამდებობაზე დანიშვნის პირველ თვეებზე, როდესაც ის დანიშვნისთანავე შვებულებაში რამდენჯერმე იმყოფებოდა.
მისი თქმით, ის მინისტრის თანამდებობაზე თანახმა იყო იმ შემთხვევაში, თუ ექნებოდა საშუალება, რომ საქმეები გადაებარებინა და ჯანმრთელობისთვის მიეხედა.
„ჩემი მოლაპარაკება, როგორც პრემიერ მინისტრთან, ასევე პარტიის ლიდერთან, მკაფიოდ ის იყო, რომ მე ვთანხმდებოდი ამ თანამდებობას მხოლოდ იმ შემთხვევაში, თუ მექნებოდა საშუალება, რომ საქმეები გადამებარებინა და ჯანმრთელობისთვის მიმეხედა და ჩვენი მოლაპარაკება იყო იმაზე, რომ მე დავიწყებდი სრულფასოვნად ამ სამუშაოს მხოლოდ სექტემბრის დასაწყისში. ეს იყო მკაფიოდ თქმული და მოლაპარაკებული. ამასთან ერთად მე, რა თქმა უნდა, რამდენჯერმე ჩამოვედი საქართველოში და ვიმუშავე, მაგრამ სრულფასოვნად მუშაობას შევუდექი მხოლოდ სექტემბრიდან. მე მომდიოდა ხმები იმასთან დაკავშირებით, რომ როცა არ ვიყავი საქართველოში მწვავე კრიტიკის ქვეშ მოვყევი საქართველოში არ ყოფნის გამო. მე მართალი, რომ გითხრათ ძალიან გამაკვირვა იმან, რომ არავინ დამიცვა, იგივე ჩემი გუნდიდან, იგივე მმართველი გუნდიდან და მაშინ ვერ ვხვდებოდი რაში იყო საქმე. შესაძლებელია, ახლა ვხვდებოდე, მაგრამ მაშინ ჩემთვის გასაკვირი იყო”, - განაცხადა ქობულიამ.