კორონავირუსით ინფიცირებული ჩვენი პაციენტების უმრავლესობა ქლოროქინს იყენებს, რომელიც ერთ-ერთ საიმედო პრეპარატად ითვლება, როგორც მსუბუქი, ისე საშუალო სიმძიმის პაციენტების სამკურნალოდ, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ საქართველოს პირველი არხის საინფორმაციო გამოშვება „მოამბეში“ განაცხადა.
მისივე თქმით, პრეპარატი ახალი არ არის, ძალიან დიდი ხნის გამოცდილი პრეპარატია.
„როდესაც პირველი კონსულტაციები გვქონდა ჩვენს ჩინელ კოლეგებთან, პირველი ტელეხიდი ამ რამდენიმე კვირის წინ მოეწყო საქართველოში ჩინეთის საელჩოსა და ჩინეთის სამინისტროს მედიაციით, მაშინაც გაიჟღერა ამან, რომ ერთ-ერთი ეფექტური ე.წ. ქლოროქინის სხვადასხვა ფორმებია ამ წამლის, გამოყენების შესახებ, რომელსაც საქართველოში წარმატებით იყენებს ბატონი თენგიზის კლინიკა და სხვა კლინიკები ამას უკვე რამდენიმე კვირაა, დიახ, ეს სწორია. და ის, რაც პრეზიდენტმა ტრამპმა თქვა, პატარა განსხვავება არის, ამ დეტალებში მე ახლა ღია ეთერში არ ჩავალ. როგორც ვიცი, უმრავლესობა დღეს ჩვენი პაციენტებისა, ვინც არიან დღეს საავადმყოფოებში, ამ პრეპარატს იყენებენ“,- აღნიშნა გამყრელიძემ.
მისივე თქმით, შესაბამისმა დეპარტამენტმა გარკვეული რაოდენობა ამ პრეპარატისა გაერო-ს ბავშვთა ფონდს შეუკვეთა.
„დღეს მე უკვე მქონდა საუბარი გაერო-ს ბავშთა ფონდთან, რომლისგანაც ბევრ რამეს მათი მეშვეობით ვიღებთ ხოლმე, ვყიდულობთ და უკვე ჩვენმა შესაბამისმა დეპარტამენტმა გარკვეული რაოდენობა ამ პრეპარატისა შეუკვეთა გაერო-ს ბავშვთა ფონდს, რადგან მათ სპეციალური არხები აქვთ მოწოდების. ასევე, დღეს მივმართეთ გლობალურ ფონდს, რომელიც აკოორდინირებს მსოფლიოში მალარიის, ტუბერკულოზის და შიდსის საკითხებს, რომ ასევე ეს პრეპარატი უფრო ფართოდ ხელმისაწვდომი იყოს საქართველოში“,- განაცხადა გამყრელიძემ.
