ევროკავშირი და მისი წევრი სახელმწიფოები გმობენ რუსთის მიერ განხორციელებულ კიბერშეტევას. შესაბამის განცხადებას ევროკავშირის წარმოამდგენლობა ავრცელებს.
"2019 წლის 28 ოქტომბერს საქართველო მიზანმიმართული კიბერშეტევის მსხვერპლი გახდა, რამაც ქვეყნის სოციალურ და ეკონომიკურ ინფრასტრუქტურას ზიანი მიაყენა.
ევროკავშირი და მისი წევრი სახელმწიფოები გამოხატავენ შეშფოთებას კიბერშეტევასთან დაკავშირებით, რომელიც კიბერსივრცეში უსაფრთხოებასა და სტაბილურობას უგულებელყოფს და ძირს უთხრის პოლიტიკურ, სოციალურ და ეკონომიკურ სარგებელს, რომელიც ინტერნეტს მოაქვს, ამ სარგებლის განვითარებას და ინფორმაციული და საკომუნიკაციო ტექნოლოგიების (ICTs) გამოყენებას.
ევროკავშირი და მისი წევრი სახელმწიფოები გმობენ კიბერშეტევას და გააგრძელებენ დახმარებას საქართველოს კიბერმედეგობის გასაზრდელად. ჩვენ შეშფოთებულნი ვართ კიბერსივრცეში უპასუხისმგებლო და დესტაბილიზაციის მომტანი ქცევის ზრდის გამო და გავაგრძელებთ იმ გამოწვევებთან გამკლავებას, რომელსაც კიბერსივრცე გვიქმნის როგორ შიდა ისე საგარეო და უსაფრთხოების პოლიტიკასთან დაკავშირებით.
ევროკავშირი და მისი წევრი სახელმწიფოები, მოუწოდებენ საერთაშორისო თანამეგობრობას, გააგრძელოს და განამტკიცოს თანამშრომლობა გლობალური, ღია, სტაბილური, მშვიდობიანი და უსაფრთხო კიბერსივრცის დასამკვიდრებლად, სადაც ადამიანის უფლებები, ძირითადი თავისუფლებები და კანონის უზენაესობა სრულად იქნება დაცული.
ევროკავშირი და მისი წევრი სახელმწიფოები ხაზგასმით აღნიშნავენ მზაობას, გააგრძელონ კიბერსივრცეში პასუხისმგებლიანი ქცევის ხელშეწყობა საერთაშორისო სამართლის, პასუხისმგებლიანი სახელმწიფო ქცევის ნორმების, კიბერ ნდობის გაზრდის რეგიონალური ზომების გამოყენებისა და მავნე კიბერ ქმედებებზე ევროკავშირის ერთობლივი დიპლომატიური რეაგირების ჩარჩოს საშუალებით.
მოვუწოდებთ საერთაშორისო თანამეგობრობას, განაგრძოს თავისი წვლილის შეტანა საერთაშორისო მშვიდობისა და უსაფრთხოების უზრუნველყოფაში და იხელმძღვანელოს იმ კონსენსუსით, რომელიც ეფუძნება საერთაშორისო უსაფრთხოების ჭრილში "ინფორმაციის და ტელეკომუნიკაციების სფეროში გაეროს სამთავრობო ექსპერტთა ჯგუფის“ (UNGGE) 2010, 2013 და 2015 წლების მოხსენებებს. ასევე, მოვუწოდებთ, ამ კონსენსუსის გაძლიერების მიზნით, გააღრმავონ თანამშრომლობა გაეროსა და სხვა შესაბამის საერთაშორისო ფორუმების დონეზე", - ნათქვამია განცხადებაში.
საქართველოს საგარეო საქმეთა სამინისტროს მიერ გავრცელებული ინფორმაციის თანახმად, 2019 წლის 28 ოქტომბერს განხორციელებულ კიბერშეტევაზე პასუხისმგებელია რუსეთის შეიარაღებული ძალების გენერალური შტაბი.
"2019 წლის 28 ოქტომბერს საქართველოში განხორციელდა ფართომასშტაბიანი კიბერშეტევა საქართველოს პრეზიდენტის ადმინისტრაციის, სასამართლო სისტემის, სხვადასხვა მუნიციპალიტეტის საკრებულოების, სახელმწიფო, კომერციული და მედია ორგანიზაციების ვებ-გვერდებზე, სერვერებსა და სხვა მართვით სისტემებზე.
კიბერშეტევის შედეგად დაზიანდა ზემოაღნიშნული ორგანიზაციების სერვერები, მართვითი სისტემები და მნიშვნელოვნად შეფერხდა მათი ფუნქციონირება.
აღნიშნული კიბერშტევა მიზნად ისახავდა საქართველოს ეროვნული უსაფრთხოების ხელყოფას, საქართველოს მოსახლეობისათვის ზიანის მიყენებას და სამთავრობო სტრუქტურების, ასევე სხვადასხვა ორგანიზაციების ფუნქციონირების შეფერხებით და მოშლით საზოგადოებაში მღელვარების დათესვას.
ქართული მხარის მიერ ჩატარებული გამოძიებით და საერთაშორისო პარტნიორებთან ურთიერთთანამშრომლობის შედეგად მიღებული ინფორმაციის შესაბამისად, აღნიშნული კიბერშეტევა დაიგეგმა და განხორციელდა რუსეთის ფედერაციის შეიარაღებული ძალების გენერალური შტაბის მთავარი სამმართველოს მიერ", - ნათქვამია საგარეო უწყების განცხადებაში.
რუსეთის მიერ საქართველოზე განხორციელებული შეტევა დაგმეს შეერთებულმა შტატებმა, დიდმა ბრიტანეთმა, პოლონეთმა, დანიამ, ჩეხეთმა, ნორვეგიამ, ლიეტუვამ და მთელმა საერთაშორისო საზოგადოებამ.
