ევროკავშირის უმაღლესი წარმომადგენელი საგარეო და უსაფრთხოების პოლიტიკის საკითხებში ჟოზეფ ბორელი აცხადებს, რომ ევროპას შეშფოთების გარდა, სხვა ქმედითი ნაბიჯების გადადგმაც უნდა შეეძლოს.
ამის შესახებ ბორელმა მიუნხენის კონფერენციაზე, პანელურ დისკუსიაზე საუბრისას განაცხადა.
"ევროპას უნდა გააჩნდეს ქმედითი ინსტრუმენტები, გარდა იმისა რომ შეშფოთება გამოხატოს. ჩვენ უნდა მოვახდინოთ დემონსტრირება იმისა, რომ მზად ვართ მოქმედებისთვის.
ევროპამ უნდა ისწავლოს ძალის ენა და შესაძლოა, ძალა სამხედრო ძალასაც ნიშნავდეს, თუმცა არა ყოველთვის. ჩვენი ქმედება არ უნდა გამოიხატებოდეს მხოლოდ იმაში, რომ ვიძახდეთ "შეშფოთებულები ვართ, ძალიან შეშფოთებულები ვართ ან უკიდურესად შეშფოთებულები ვართ", - თქვა ბორელმა.
მიუნხენი, უსაფრთხოების 56-ე კონფერენციაზე, მსოფლიო პოლიტიკურ ლიდერებს, აკადემიური წრეებისა და სამოქალაქო საზოგადოების წარმომადგენლებს 14-16 თებერვალს მასპინძლობს.