სუდანის დედაქალაქ ხარტუმში, ერთ-ერთ კერძო ზოოპარკში, ცხოველთა უფლებადამცველმა ოსმან სალიჰმა შიმშილისგან სიკვდილის პირას მისული აფრიკული ლომები აღმოაჩინა.

ცხოველებს უკვე რამდენიმე კვირაა საკვები არ მიუღიათ, რადგან ზოოპარკის ადმინისტრაცია ფინანსური სიდუხჭირის გამო მტაცებლების უზრუნველყოფას ვერ ახერხებს.

შიმშილობის გამო, მტაცებლებმა დაკარგეს თავიანთი წონის ორი მესამედი.

ზოოპარკის მენეჯერი ირწმუნება, რომ თანამშრომლები ცდილობენ თავიანთი სახსრებით გამოკვებონ ლომები, თუმცა ეს მათთვის არ არის საკმარისი.

როგორც იუწყებიან, ხარტუმის ზოოპარკში თავდაპირველად 5 აფრიკული ლომი იმყოფებოდა, რომელთაგან ორი უკვე შიმშილობამ იმსხვერპლა.

ხარტუმელი აფრიკული ლომების გადასარჩენად დაწყებულია საერთაშორისო კამპანია, რომლის ფარგლებში მსურველები ზოოპარკს თანხას ურიცხავენ, რათა მათ შეძლონ მტაცებლების გამოკვება.

ბუნების დაცვის საერთაშორისო ორგანიზაციის თანახმად, აფრიკული ლომები "დაუცველ" სახეობად ითვლება.

1993 წლიდან 2014 წლამდე მათი რიცხვი 43 პროცენტით შემცირდა. დღესდღეობით, მსოფლიოში დაახლოებით 20 000 აფრიკული ლომია.