ჭყონდიდის ყოფილი მიტროლოპიტი პეტრე ცაავა პრეზიდენტის შეწყალების აქტს ეხმიანება და ამბობს, რომ პრეზიდენტის მიერ დეკანოზ მამალძის შეწყალებაზე უარის თქმა, მისი დამოუკიდებელი გადაწყვეტლება არ არის.
"ქალბატონი პრეზიდენტის, როგორც თვითონ უწოდებს თავს „მართმადიანი" პრეზიდენტის, „მართმადიანი" გადაწყვეტილება იყო. ანუ, დამახინჯებული მართმადიდებლობის, უსჯულო ადამიანის ურცხვი გადაწყვეტილება იყო. მაგრამ, ეს გადაწყვეტილება არ იყო მისი პირადი და დამოუკიდებელი. ეს არის ურცხვი პატრიარქისა და უმადლო პატრიარქის ზეწოლის შედეგად და ბრძანებისა და თანხმობის შედეგად ერთობლივი გადაწყვეტილება. სრული პასუხისმგებლობით ვაცხადებ. ისევე როგორც, ციანიდის საქმე დაიგეგმა უსჯულო ხელისუფალთა და უსჯულო საქართველოს საპატრიარქოს წარმომადგენელთა ერთობლივი გადაწყვეტილებით, დღესაც ფაქტობრივად პარალიზებული დეკანოზი დარჩა საპყრობილეში ურცხვი და ურჯულო ხელისუფალთა პრეზიდენტისა და საპატრიარქოს წარმომადგენელთა ერთობლივი ურჯულოებით. მაგრამ, დარწმუნებული ვარ ბოლო სიტყვას უფალი იტყვის. უფალი მეფობს და ქრისტეშობის მადლი აუცილებლად იზეიმებს. ჭეშმარიტება, მართლმადიდებლობა სიკეთე და სიყვარული საქართველოში ჩვენ გვაერთიანებს და როდესაც უსიყვარულო პრეზიდენტი, ურცხვი პრეზიდენტი ასეთ გადაწყვეტილებას აცხადებს და ერში დაპირისპირებაზე საუბრობს, ერთადერთი რაც არის, ბოროტებას დავუპირისპიროთ სიკეთე. ეს იყო უსიყვარულო, უმადლო, ურცხვი ურჯულო გადაწყვეტილება", - თქვა ცაავამ.
პრეზიდენტმა დეკანოზი გიორგი მამალაძე არ შეიწყალა. მისი თქმით, საქმე ზედმეტად პოლიტიზირებულია და გადაწყვეტილებაზე თავად სრულად იღებს პასუხისმგებლობას.
"ბოლომდე მოვისმინე ადვოკატების არგუმენტები, დეტალურად გავეცანი წმინდა სინოდის შუამდგომლობას და მივიღე გადაწყვეტილება, რომელზეც მთლიანად ვიღებ პასუხისმგებლობას. ეს გადაწყვეტილება პირველ რიგში სამართლიანობის პრინციპს ეფუძნება. ვერ მოვნახე არგუმენტი, მითუმეტეს შეწყალების კრიტერიუმების გამკაცრების პირობებში, როცა ბევრი მსჯავრდებულის საქმე განხილული ვერ იქნებოდა, რატომ უნდა დაშვებულიყო გამონაკლისი დეკანოზ გიორგი მამალაძის საქმეზე" , - განაცხადა სალომე ზურაბიშვილმა.
შეგახსენებთ, რომ წმინდა სინოდმა პრეზიდენტს დეკანოზ გიორგი მამალაძის შეწყალების თხოვნით შუამდლომლობით მიმართა. პრეზიდენტის ადმინისტრაციამ შეწყალებასთან დაკავშირებული შუამდგომლობა საქართველოს საპატრიარქოდან 2019 წლის 8 ნოემბერს მიიღო.
დეკანოზ მამალაძეს 2017 წლის 5 სექტემბერს 9 წლით თავისუფლების აღკვეთა შეეფარდა.
