ერაყის პარლამენტმა მიიღო რეზოლუცია, რომელიც მოუწოდებს უცხო ქვეყნის ჯარებს, დატოვონ ერაყის ტერიტორია.
რეზოლუცია აშშ-ისა და ირანის მზარდი დაძაბულობის ფონზე მიიღეს.
გარდა ამისა, ერაყის პარლამენტი სთხოვს ქვეყნის მთავრობას, არ მისცეს უცხო ქვეყნის ჯარებს ერაყის მიწის, წყლისა და საჰაერო სივრცის გამოყენების უფლება.
აღსანიშნავია, რომ ერაყის ტერიტორიაზე დაახლოებით 5 000 ამერიკელი სამხედრო იმყოფება.
ერაყის პარლამენტში აღნიშნული საკითხი ირანელი გენერლის, ყასემ სულეიმანის ლიკვიდაციის შემდეგ გახდა აქტუალური.
შეერთებულ შტატებსა და ირანს შორის დაძაბულობის ახალი ტალღა ირანელი გენერლის ყასემ სულეიმანის მკვლელობას მოჰყვა.
ერაყის დედაქალაქ ბაღდადში, აეროპორტის სიახლოვეს, შეერთებული შტატების მიერ განხორციელებული სარაკეტო დარტყმის დროს, მოკლეს ირანის ისლამური რევოლუციის გუშაგთა კორპუსის ერთ-ერთი ელიტარული ქვედანაყოფის "ყუდსის" ლიდერი, გენერალი ყასემ სულეიმანი.
გენერალ სულეიმანის მკვლელობის გამო ირანში 3-დღიანი გლოვა განაცხადა. ქვეყნის უზენაესმა ლიდერმა აიათოლა ალი ხამენეიმ განაცხადა, რომ ირანი ყასემ სულეიმანის გამო შურს იძიებს.
