ირანთან უკიდურესი დაძაბულობის ფონზე, შეერთებული შტატები ახლო აღმოსავლეთში დამატების 3 ათას სამხედროს გაგზავნას გეგმავს. იტყობინება CNN აშშ-ის თავდაცვის დეპარტამენტის წარმომადგენელზე დაყრდნობით.
მედიის ინფორმაციით, 3 ათასი სამხედრო სწრაფი რეაგირების 82-ე საჰაერო-სადესანტო დივიზიაში ირიცხება.
მანამდე, პენტაგონის ხელმძღვანელი მაიკ ესპერი აცხადებდა, რომ ბაღდადში შეერთებული შტატების საელჩოზე თავდასხმის გამო, რეგიონში დამატებით 750 სამხედროს გაგზავნიდა.
შეგახსენებთ, დღეს ცნობილი გახდა, რომ ერაყის დედაქალაქ ბაღდადში, აეროპორტის სიახლოვეს, შეერთებული შტატების მიერ განხორციელებული სარაკეტო დარტყმის დროს, მოკლეს ირანის ისლამური რევოლუციის გუშაგთა კორპუსის ერთ-ერთი ელიტარული ქვედანაყოფის "ქუდსის" ლიდერი, გენერალი ყასემ სულეიმანი.
გენერალ სულეიმანის მკვლელობის გამო ირანში 3-დღიანი გლოვა განაცხადა. ქვეყნის უზენაესმა ლიდერმა აიათოლა ალი ხამენეიმ განაცხადა, რომ ირანი ყასემ სულეიმანის გამო შურს იძიებს.
31 დეკემბერს ბაღდადში საპროტესტო აქციის მონაწილეები თავს დაესხნენ ერაყში შეერთებული შტატების საელჩოს და მის ტერიტორიაზე შეჭრას შეეცადნენ. თუმცა მათი მოგერიება მოახერხეს ამერიკელმა სამხედროებმა.
საპროტესტო აქციის მონაწილეები გმობენ აშშ-ის მიერ ერაყში განთავსებულ "ჰეზბოლას" ობიექტებზე განხორციელებულ ავიაიერიშს, რომელსაც 25 ადამიანი ემსხვერპლა.
აშშ-ის საელჩომ ბაღდადში, საპროტესტო აქციების გამო, მუშაობა შეწყვიტა.