საქართველოს პრეზიდენტი დღეს აგარაში Hipp georgia-ს ქარხანას სტუმრობდა. როგორც სააკაშვილმა აღნიშნა, "ეს ქარხანა მსოფლიოში ყველაზე მაღალი ხარისხის პროდუციას აწარმოებს".
"ამ ეტაპზე აქ 200-მდე ადამიანია დასაქმებული. მათი რიცხვი კიდევ გაიზარდა. ერთი რამ უნდა გვესმოდეს, რომ ამით შეიქმნა სტანდარტი, რომ საქართველო აწარმოებს ორგანულ საკვებს - ქიმიურად არადაბინძურებულ საკვებს. ჩვენ გვაქვს უნიკალური ხარისხის ხილი, პროდუქცია და ყველაფერი უნდა გავაკეთოთ იმისთვის, რომ არ დაგვემართოს იგივე, რაც პოლონეთს, რუმინეთს, ბულგარეთს, უნგრეთს დაემართა, სადაც ყველაფერი ქიმიური და ჯანმრთელობისთვის მავნე გახდა", - განაცხადა პრეზიდენტმა.
თავის მხრივ, სოფლის მეურნეობის მინისტრმა ბაკურ კვეზერელმა, რომელიც აგარაში სააკაშვილთან ერთად იმყოფებოდა, აღნიშნა, რომ " Hipp" ტრანსნაციონალური კომპანიაა, რომელსაც წარომადგენლობა ბევრ ქვეყანაში აქვს.
"საქართველოში მისი ინვესტიციები ნიშნავს, რომ მას მოჰყვება კიდევ ბევრი ინვესტიცია სოფლის მეურნეობის სფეროში. რაც მნიშვნელოვანია არა მხოლოდ მეხილეობისთვის, არამედ მთლიანად ჩვენი ქვეყნის ეკონომიკისთვის. ჩვენ ყველანაირად ხელს შევუწყობთ ინვესტორს, რომ ის გეგმა, რაც მას განსახორციელებელი აქვს მომავალი ორი წლის განმავლობაში, ვგულისხმობ მთელი საქართველოს მასშტაბით ვაშლისა და სხვა ხილის გადამუშავებას, იყოს წახალისებული და ხელშეწყობილი", - განაცხადა ბაკურ კვეზერელმა.
შეგახსენებთ, რომ Hipp-ის საწარმო რამდენიმე თვეა პროდუქციას უშვებს და ის როგორც ადგილობრივ, ისე უცხოურ ბაზარზე იყიდება. Hipp-ის საწარმოს გახსნაში გერმანული ინვესტიცია ჩაიდო.