„სოკარ ჯორჯია გაზის" კახეთის შვიდ რაიონულ ორგანიზაციაში თანამშრომლებს გათავისუფლებაზე განცხადებები დააწერინეს.
როგორც კახეთის საინფორმაციო ცენტრი იუწყება, გათავისუფლების შესახებ განცხადებები 500-ზე მეტმა ადამიანმა დაწერა.
კომპანიის თანამშრომლების თქმით, განცხადებების დაწერა მათ რაიონული ორგანიზაციების ხელმძღვანელებმა მოსთხოვეს და გააფრთხილეს, რომ ბევრ მათგანს ახალი ხელშეკრულება აღარ გაუფორმდება.
„გურჯაანგაზის" დირექტორის გიორგი მაჭავარიანის განცხადებით, კომპანიაში მიმდინარეობს რეორგანიზაცია და თანამშრომლების მიერ სამსახურიდან გათავისუფლების შესახებ განცხადებების დაწერა ამას უკავშირდება.
შრომის კოდექსით, თუ დასაქმებული სამსახურიდან წასვლაზე განცხადებას თავად წერს, მას ერთი თვის ხელფასის ოდენობით კომპენსაცია არ ეძლევა.
„სოკარ ჯორჯია გაზი" კახეთის შვიდ რაიონში, გაზგამანაწილებელ კომპანიებს 2010 წლის იანვრიდან ფლობს. კომპანიის საზოგადოებასთან ურთიერთობის სამსახურის უფროსის თემურ გაჯიევის განმარტებით, რეორგანიზაცია პირველი იანვრიდან მიმდინარეობს და 15 იანვრამდე დასრულდება. რეორგანიზაციის შედეგად „სოკარ ჯორჯია გაზი კახეთი" ჩამოყალიბდება.
