ხვალ იურიდიული დახმარების სამსახურის კონფერენცია თემაზე - "ადვოკატის როლი სამართლებრივ სახელმწიფოში" გაიხსნება.
ღონისძიებას სახელმწიფო, საერთაშორისო და არასამთავრობო ორგანიზაციების წარმომადგენლები, ასევე იურიდიული დახმარების სამსახურის თანამშრომლები დაესწრებიან.
კონფერენციას გახსნიან საქართველოში ევროკავშირის დელეგაციის პროგრამების განყოფილების უფროსი მარტინ კლაუკე, სასჯელაღსრულების, პრობაციისა და იუდიული დახმარების საკითხთა მინისტრის მოადგილე გიორგი მაკასარაშვილი და იუსტიციის მინისტრის მოადგილე თინათინ ბურჯალიანი.
ღონისძიება ტარდება ევროკავშირის პროექტის "კანონის უზენაესობის მხარდაჭერა საქართველოში" ორგანიზებით და ორდღიანია.
17 დეკემბერს, იურიდიული დახმარების სამსახურის დირექტორი ირაკლი კობიძე 2010 წელს სამსახურის საქმიანობის შედეგებს შეაჯამებს და წარმატებულ თანამშრომლებს დააჯილდოვებს. გარდა ამისა, მონაწილეთა წინაშე მოხსენებებით წარსდგებიან უზენაესი სასამართლოს მოსამართლე გიორგი შავლიაშვილი და ევროკავშირის პროექტის "კანონის უზენაესობის მხარდაჭერა საქართველოში" ხელმძღვანელი რენატე ვინთერი.
გაიმართება მსჯელობა სისხლის სამართლის საპროცესო კანონმდებლობის, არასრულწლოვანთა მართლმსაჯულებისა და საქართველოს ადვოკატთა ასოციაციის ეთიკის კოდექსის საკითხებზე.
18 დეკემბერს, იურიდიული დახმარების სამსახურის დირექტორი ირაკლი კობიძე სისხლის სამართლის საქმეებზე მომუშავე საზოგადოებრივი ადვოკატების პროფესიული საქმიანობის სტანდარტების თემაზე მოხსენებით გამოვა.
გარდა ამისა, იურიდიული დახმარების სამსახურის თანამშრომლები, სამუშაო ჯგუფების ფორმატში, საზოგადოებრივი ადვოკატების სპეციალიზაციის, მათი სასწავლო საჭიროებების, ასევე იურიდიული დახმარების ბიუროების მართვისა და მოწვეულ საზოგადოებრივ ადვოკატთა რეესტრში რეგისტრირებული ადვოკატების საქმიანობის საკითხებს განიხილავენ.
სასჯელაღსრულების, პრობაციისა და იურიდიული დახმარების საკითხთა სამინისტროს იურიდიული დახმარების სამსახური მოსახლეობას უფასო საადვოკატო მომსახურებასა და სამართლებრივ კონსულტაციებს უწევს. ევროკავშირი, კანონის უზენაესობის მხარდაჭერის პროექტის ფარგლებში, იურიდიული დახმარების სამსახურს ხელს უწყობს ადამიანური რესურსების განვითარებასა და უფასო იურიდიული დახმარების შესახებ საზოგადოების ცნობიერების ამაღლებაში.
კონფერენცია ხვალ, 17 დეკემბერს, 11:00 საათზე, თბილისში, სასტუმრო "შერატონ მეტეხი პალასში" გაიხსნება.
