საქართველოს ფინანსთა სამინისტროს მომსახურების სააგენტო მომხმარებლებს კომფორტული და გამარტივებული სამუშაო გარემოს შექმნის მიზნით, სთავაზობს ახალ მომსახურებას - მკაცრი აღრიცხვის ფორმების ელექტრონულ რეგისტრაციას.
დღემდე მკაცრი აღრიცხვის ფორმების რეგისტრაციისათვის სამართალსუბიექტს ესაჭიროებოდა განცხადებისა და დოკუმენტაციის წერილობითი სახით მხოლოდ ფოსტის მეშვეობით ან ადგილზე წარმოდგენა, სააგენტომ იზრუნა პროცედურის გამარტივებაზე და რეგისტრაცია ასევე შესაძლებელი გახადა ელექტრონული გზითაც, ვებ გვერდზე www.seragency.gov.ge.
ეს პროექტი, ისევ და ისევ ორიენტირებულია მომხმარებლის სამუშაო პირობების გაუმჯობესებაზე, დროის დაზოგვაზე და შენობიდან გაუსვლელად სასურველი შედეგების მიღებაზე. პროექტი საკმაოდ ხელსაყრელი და მომგებიანი იქნება რეგიონებისათვის, ვინაიდან ისინი განცხადებას წარმოადგენენ ელექტრონული გზით და ამავე გზით მიიღებენ პასუხს, მომხმარებლებს აღარ დასჭირდებათ დოკუმენტაციის ფოსტის საშუალებით ან ადგილზე წარმოდგენა.
2010 წლის განმავლობაში დაახლოებით 140-მდე სამართალსუბიექტმა მომართა სააგენტოს მკაცრი აღრიცხვის ფორმების რეგისტრაციისათვის და დღეისათვის დარეგისტრირებულია 612 ფორმა.
ელექტრონული რეგისტრაციის, განცხადების შევსების, წარმოდგენის წესებისა და პირობების გაცნობა შესაძლებელია სააგენტოს ვებ გვერდზე www.seragency.gov.ge.
ფინანსთა სამინისტროს მომსახურების სააგენტოს მიერ შემოთავაზებული ახალი სერვისი, მომხმარებელთათვის დროის დაზოგვის ყველაზე მარტივი და კომფორტული საშუალებაა.
