იუსტიციის მინისტრმა თეა წულუკიანმა გადაცემა “იმედი LIVE”-ში სასამართლო რეფორმის შესახებ ისაუბრა და აღნიშნა, რომ რეფორმები გაიზომა და გუშინწინ, მსოფლიოში რიგით მესამე კომპანიამ, რომლის სანდოობასაც არცერთი დასავლეთ-ევროპული ქვეყანა არ აყენებს ეჭვქვეშ, დადო შედეგი, რომლის მიხედვითაც, ფართო საზოგადოების 51 % თვლის, რომ ამ რეფორმების შედეგად, სასამართლო არის უფრო დამოუკიდებელი ვიდრე იყო.
„მასშტაბური რევოლუციური რეფორმები გატარდა სწორედ 2013 – 2016 წლებში ჩვენი ხელმძღვანელობით, იუსტიციისა და მთავრობის. ეს რეფორმები გაიზომა და გუშინწინ, მსოფლიოში რიგით მესამე კომპანიამ, რომლის სანდოობასაც არც ერთი დასავლეთ-ევროპული ქვეყანა არ აყენებს ეჭვქვეშ, დადო შედეგი, რომელიც ამბობს, რომ ჩვენი ფართო საზოგადოების 51 % თვლის, რომ ამ რეფორმების შედეგად, სასამართლო არის უფრო დამოუკიდებელი, ვიდრე იყო. 52 % ამბობს, რომ სასამართლო არის სანდო ინსტიტუტი, 41 % ამბობს, რომ სასამართლო დღეს ყველას თანაბრად ეპყრობა და კიდევ 52 % პროცენტი ამბობს, რომ ამ რეფორმების შედეგად სასამართლო მომსახურება გაუმჯობესდა. რაც კიდევ უფრო საინტერესოა, საზოგადოების ის ნაწილი, რომელიც მომხმარებელია, ანუ მხარე ყოფილა სასამართლოში, მათგან 55 % თვლის, რომ ამ რეფორმებმა სასამართლო დამოუკიდებელი გახადა. შესაბამისად, ადამიანებთან ბრძოლის მატარებელი ჩემთვის უკვე ჩავლილია, იმიტომ რომ ერთ ბრძოლას ორჯერ არ ბრძოლობენ. ერთი ბრძოლა ვიბრძოლე და დამთავრდა ისე, როგორც დამთავრდა და ახლა მეჩვენება, რომ ეს არის დაგვიანებული. ახლა ჩვენ ახლებური ტიპის ბრძოლები გვჭირდება, კერძოდ, გაგრძელება იმ რეფორმების, 2017 წელს რომელიც გადაიბარა პარლამენტმა და მეოთხე ტალღა ჰქვია, რადგან წინა რეფორმები გაზომილია და შედეგი არის დადებითი და ხალხი მოელის რომ ეს შედეგები კიდევ უფრო გაუმჯობესდება“, - განაცხადა წულუკიანმა.
