„საქართველოს დელეგაცია, პრემიერ - მინისტრის ხელმძღვანელობით მონაწილეობას მიიღებს მიუნხენის საერთაშორისო კონფერენციაში. ეს არის ერთ-ერთი ყველაზე მაღალი დონის საერთაშორისო კონფერენცია, რომელშიც ტრადიციულად მონაწილეობენ სახელმწიფოს მეთაურები, ასევე, აღმასრულებელი და საკანონმდებლო ხელისუფლების წარმომადგენლები, სხვადასხვა გავლენიანი ანალიტიკური ცენტრების ხელმძღვანელები, იმართება მრავალი ღონისძიება, მათ შორის, პარალელური ღონისძიებები.“- ამის შესახებ საქართველოს საგარეო საქმეთა მინისტრმა დავით ზალკალიანმა მიუნხენის საერთაშორისო კონფერენციაში საქართველოს დელეგაციის მონაწილეობის კომენტირებისას განაცხადა.
დავით ზალკალიანის თქმით, წელს კონფერენციაზე მნიშვნელოვანი აქცენტი გაკეთდება შავი ზღვის უსაფრთხოებაზე, საქართველოს როლზე გეოპოლიტიკურ ჭრილში და იმ წარმატებულ რეფორმებზე, რომელსაც საქართველოს ხელისუფლება ახორციელებს.
„ჩვენ ვგეგმავთ, რომ ასეთი ღონისძიებები გამოვიყენოთ საქართველოს ინტერესებისთვის, წლევანდელი კონფერენცია მაქსიმალურად იქნება გამოყენებული იმისთვის, რომ საქართველო იყოს რაც შეიძლება მკაფიოდ წარმოდგენილი საერთაშორისო გლობალური გამოწვევების ფონზე.“-აღნიშნა დავით ზალკალიანმა.
მიუნხენის უსაფრთხოების საერთაშორისო კონფერენციის ფარგლებში საქართველოს საგარეო უწყების ხელმძღვანელი ორმხრივ შეხვედრებს გამართავს კოლეგა მინისტრებთან და გერმანიის მთავრობის აღმასრულებელი და საკანონმდებლო ხელისუფლების წარმომადგენლებთან.
მიუნხენში ვიზიტის ფარგლებში დავით ზალკალიანი ქართული დიასპორის წარმომადგენლებსაც შეხვდება.