პროვოკატორები ხართ თქვენ, პირდაპირ მივმართავ, თქვენ აწყობთ პროვოკაციებს და თქვენი თელავის მერის წერილი, ეს არის პროვოკაციის მცდელობა ჩვენთან მიმართებაში, ჩვენ კი გეუბნებით, რომ ჩვენ აღვკვეთავთ ყველა პროვოკაციას თქვენი მხრიდან, - ამის შესახებ გაერთიანებული ოპოზიციის ერთ-ერთმა ლიდერმა გიორგი ვაშაძემ მმართველი გუნდის ლიდერების მისამართით განაცხადა.
მისი თქმით, გაერთიანებული ოპოზიცია გეგმებს არ ცვლის და აქციას კვირას, 16 დეკემბერს, თელავის ცენტრში, ერეკლე მეორის ძეგლთან გამართავს.
ვაშაძის განცხადებით, გაერთიანებული ოპოზიცია მხარდამჭერებთან ერთად კონსტიტუციის ფარგლებში იმოქმედებს და კვირას დაგეგმილი აქციის ლოკაცია არ შეიცვლება.
მისივე თქმით, თელავის მერმა კანონი დაარღვია, რადგან მერიას არ აქვს უფლება, აკრძალოს ან ნება დართოს აქციის ჩატარების. მისი განცხადებით, ოპოზიცია მხოლოდ ვალდებული იყო, რომ აქციის გამართვის თარიღი შეეტყობინებინა მერიისთვის.
„ეს არის კანონდარღვევა თელავის მერიის მხრიდან, რომელმაც შეასრულა „ქართული ოცნების“ მესვეურების მითითება. ჩვენ, სადაც ვთქვით, ისევ იმ მიმართულებით მივდივართ. კვირას, 16 დეკემბერს, დილის 09:00 საათზე შევიკრიბებით აეროპორტის ტრასაზე, "ნაციონალური მოძრაბის" ცენტრალური ოფისის მიმდებარე ტერიტორიაზე და ყველანი ერთად, ორგანიზებულად, მანქანებით გავემგზავრებით თელავში, სადაც მივიღებთ ამ საპროტესტო აქციაში მონაწილეობას მშვიდობიანად და გავაპროტესტებთ იმას, რომ სალომე ზურაბიშვილის ინაუგურაცია ხდება საქართველოს პრეზიდენტად“, - განაცხადა ვაშაძემ.
მისივე თქმით, საპრეზიდენტო არჩევნების შემდეგ ოპოზიციამ მმართელ გუნდს მოლაპარაკებების დაწყება შესთავაზა, თუმცა, უარი მიიღო.
„სწორედ ჩვენ შევთავაზეთ „ქართულ ოცნებას“ გამოსავალი, დავმსხდარიყავით მაგიდის გარშემო და დაგვეწყო დიალოგი იმ ფუნდამენტურ ცვლილებებთან დაკავშირებით, რაც ქვეყანაში არის გასატარებელი, რაც გვაჩვენა არჩევნებმა და ისინი მოიქცნენ დესტრუქციულად და მათ ამაზე გვითხრეს უარი. შესაბამისად, ჩვენ სხვა გზა არ გვაქვს გარდა იმისა, რომ გამოვხატოთ ჩვენი პროტესტი ამ საკითხებთან დაკავშირებით“, - აღნიშნა ვაშაძემ.
ცნობისთვის, თელავის მერიამ გაერთიანებულ ოპოზიციას აქციის გასამართად ალტერნატიული ტერიტორია შესთავაზა.