ერთ მხარეს დგანან ადამიანები ნიღბებში, თქვენ გახსოვთ ისინი და მათ მიერ ჩადენილი საქმეები. მეორე მხარეს კი ჩვეულებრივი, მართალი ადამიანები, თქვენი არჩეული ადამიანები, – ამის შესახებ საპარლამენტო უმრავლესობის ლიდერმა არჩილ თალაკვაძემ ახალქალაქში სალომე ზურაბიშვილის მხარდამჭერ ღონისძიებაზე განაცხადა.
მისი თქმით, ეს არჩევანი დღეს განაპირობებს ჩვენს მომავალს.
„მინდა, პირველ რიგში, ჩვენი გუნდის სახელით, ყველას მადლობა გადაგიხადოთ, რადგან სამცხე-ჯავახეთში ერთ-ერთი ყველაზე დიდი მხარდაჭერა მიიღო სალომე ზურაბიშვილმა და იმ იდეამ, რომელიც სალომე ზურაბიშვილთან ერთად არის. დღეს ჩვენ გვაქვს ძალიან პრინციპული არჩევანი. ერთ მხარეს დგანან ადამიანები ნიღბებში, თქვენ გახსოვთ ისინი და მათ მიერ ჩადენილი საქმეები. მეორე მხარეს კი ჩვეულებრივი, მართალი ადამიანები, თქვენი არჩეული ადამიანები. ეს არჩევანი დღეს განაპირობებს ჩვენს მომავალს. მათ სურთ წარსულით შეგვიცვალონ მომავალი, ჩვენ კი გვსურს, ნამდვილი მომავალი გვქონდეს. ამაშია განსხვავება“, – განაცხადა არჩილ თალაკვაძემ.
მისივე თქმით, „ნაციონალური მოძრაობა“ მატყუარაა.
„მატყუარები რომ არიან, საიდან ჩანს?! მათ წააგეს პირველი ტური, თანაც აქ ძალიან წააგეს, ხალხს კი ეუბნებიან, რომ პირველი ტური მოიგეს და ახლა მეორე ტურის მოგებაც სურთ. აი, რა სიცრუეს ეუბნებიან ადამიანებს. ჩვენ მოვიგეთ პირველი ტური და მეორე ტურსაც მოვიგებთ კიდევ უფრო დამაჯერებლად, თქვენთან ერთად“, – აღნიშნა არჩილ თალაკვაძემ, რომელმაც აქვე მხარდაჭერა გამოხატა ახალქალაქის მაჟორიტარი დეპუტატის, ენზელ მკოიანის მიმართ.