„ქართული ოცნება“ ცდილობს, დისკომფორტი შეუქმნას ემიგრანტებსა და რეგიონებში რეგისტრირებულ ამომრჩევლებს, - ამის შესახებ „ევროპული საქართველოს“ წევრმა ელენე ხოშტარიამ არჩევნების მეორე ტურთან დაკავშრებით განაცხადა.
მისი თქმით, საარჩევნო კოდექსის 95-ე მუხლის თანახმად, არჩევნები კვირა დღეს ტარდება და ცესკო-მ კანონის აღნიშნული ჩანაწერი არ უნდა დაარღვიოს.
„ძალიან კარგად ჩანს, რომ ცესკო არის „ქართული ოცნების“ ზეწოლის ქვეშ და „ქართულ ოცნება“, რომელიც შეშინებულია არჩევნების შედეგებითა და ხელისუფლების დაკარგვით, ცდილობს, დისკომფორტი შეუქმნას ჩვენს ემიგრანტებს პირველ რიგში, ეს ასევე გარკვეულ დისკომფორტის შეუქმნის საქართველოში, რეგიონებში დარეგისტრირებულ ადამიანებს, თუმცა ძალიან სასაცილოა ის გათვლა, რომ ამის გამო მოქალაქეები არ წავლენ და არ მისცემენ ხმას“, – განაცხადა ელენე ხოშტარიამ, რომელმაც აქვე აღნიშნა, რომ ცესკო-ს ჰქონდა შესაძლებლობა, არჩევნების შედეგები 11 ნოემბერს შეეჯამებინა, მეორე ტური კი, ორ კვირაში, 25 ნოემბერს დაენიშნა. მისივე თქმით, ახლა ერთადერთი შესაძლებლობა მეორე ტურის 2 დეკემბერს დანიშვნაა.