საქართველოს კონკურენციის სააგენტოს თავმჯდომარე, ნოდარ ხადური მოლდოვის რესპუბლიკის კონკურენციის საბჭოს პრეზიდენტს ვიორიკა კარარეს შეხვდა.
მხარეებმა, ორმხრივი შეხვედრისას, უწყებებს შორის პროფესიული თანამშრომლობის განმტკიცების საკითხებზე იმსჯელეს. მათ შორის, კონკურენციის სფეროში ნორმების დარღვევასთან დაკავშირებულ გამოცდილებასა და ინფორმაციის გაცვლის ეფექტურობაზე, ასევე ბაზარზე მონოპოლიური მდგომარეობის ბოროტად გამოყენების, არაკეთილსინდისიერი კონკურენციის აღკვეთის საერთაშორისო მეთოდოლოგიის შემუშავებაზე; კონკურენციის პოლიტიკის აღსრულებისა და პროცედურული სამართლიანობის რისკებზე, პერსპექტივებზე, ინიციატივებზე და ა.შ.
შეხვედრა საქართველოსა და მოლდოვის კონკურენციის უწყებებს შორის ურთიერთთანამშრომლობის მემორანდუმის ფარგლებში განხორციელდა, რომელსაც ხელი 2017 წელს მოეწერა.
ნოდარ ხადური 13-15 ნოემბერს, ქ. კიშინიოვში, მოლდოვის რესპუბლიკის კონკურენციის საბჭოსა და ამერიკის შეერთებული შტატების საგამოძიებო ფედერალური ბიუროს მიერ ორგანიზებულ კონფერენციაში - „კონკურენციის საწინააღმდეგო ქმედებათა მოკვლევის პროცედურები და მეთოდები" იღებს მონაწილეობას. კონკურენციის სფეროში წამყვანი ექსპერტები შემდეგ საკითხებს განიხილავენ - FBI პროაქტიული მეთოდოლოგია; თანამშრომლობის (Leniency) პროგრამა; დომინანტური მდგომარეობის ბოროტად გამოყენების დაუშვებლობა, ანტიკონკურენტული შეთანხმებები და ა.შ. კონფერენციაში ასევე მონაწილეობენ - მოლდოვის, ბელარუსიის, ლიეტუვას, რუმინეთის, უკრაინისა და სხვა ქვეყნის წარმომადგენლები.