არ შეიძლება სამხედროების და ფორმიანი ადამიანების პოლიტიკაში ჩართვა, ეს ანგრევს სისტემას, - ამის შესახებ პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილმა განაცხადა.
მისი თქმით, ყველა ხვდება, რომ ამ განცხადებების უკან პირდაპირ თუ არაპირდაპირ დგას „ნაციონალური მოძრაობის“ ინტერესები.
„გული მწყდება, რომ ელემენტარულად ვერ ხდება იმ პრინციპების დაცვა, რაც აღიარებულია საერთაშორისო ნომრებით. არ შეიძლება სამხედროების და ფორმიანი ადამიანების პოლიტიკაში ჩართვა, ეს ანგრევს სისტემას. ჩვენ ძალიან კარგად გვახსოვს ჯაბა იოსელიანი და სხვები, ვინც სამხედრო ფორმებში განცხადებებს აკეთებდნენ, მაგრამ უნდა ვიცოდეთ, რომ ეს ქმედება ჩაბარდა წარსულს. ამ ქმედებით, რასაც დღეს ჩვენ ვხედავთ და ამას კამპანიური ხასიათი აქვს, კარგად ჩანს ჩვენი ოპონენტების დამოკიდებულება სახელმწიფოებრიობასთან. არ შეიძლება პოლიტიკური მიზნებისთვის ჩართო სამხედროები", - განაცხადა სესიაშვილმა.
ცნობისთვის, სამხედროების ნაწილი სოციალური ქსელის საშუალებით ვიდეოებსა და ფოტოებს აქვეყნებს, სადაც აღნიშნავენ, რომ არჩევნების მეორე ტურში სალომე ზურაბიშვილს მხარს არ უჭერენ, რადგან ის მოღალატეა.
