დღეს არის 12 ნოემბერი, ჩვენ ვსაუბრობთ დეკემბრის თვეზე, დეკემბრის შუა რიცხვებია დაახლოებით, ასე რომ, დაველოდოთ ერთი თვე კიდევ და როდესაც მივალთ დეკემბერში, ჩვენ მივიღებთ გადაწყვეტილებას დედაქალაქის მოსახლეობასთან ერთად, რას და როგორ გავაკეთებთ, ძალიან მარტივად, - ამის შესახებ თბილისის მერმა კახა კალაძემ პარლამენტთან მიმდინარე აქციასთან დაკავშირებით ჟურნალისტებს განუცხადა.
მისი თქმით, მერია ვალდებული იყო, ზაზა სარალიძის წერილზე პასუხი სამი დღის ვადაში გაეცა, სადაც აღნიშნულია, რომ საახალწლო ღონისძიებები დაგეგმილია დეკემბრის თვეში.
„დედაქალაქის მერიას დაგეგმილი ჰქონდა ღონისძიებები დეკემბრის თვეში, შესაბამისად, წერილში ეს ყველაფერი არის მოცემული, რომ 15 დეკემბერს არის ნაძვის ხის ანთება, რომელიც არის ტრადიცია და ეს კახა კალაძის, ან თბილისის მერიის მოგონილი არ არის, ეს არის ტრადიცია და შესაბამისად, ამ ღონისძიებებს სჭირდება მომზადება, რომელიც იწყება დაახლოებით 7-10 დეკემბრიდან”, – განაცხადა კალაძემ.