პროკურატურამ 26 მაისის აქციის შემდეგ ნაპოვნი ცხედრების ექსჰუმაცია ჩაატარა, - ამის შესახებ ტელეკომპანია „იმედი“ ავრცელებს. ტელეკომპანიის ინფორმაციით, პროკურატურა ეჭვქვეშ აყენებს 2011 წლის 26 მაისის აქციის დარბევის შემდეგ, მეტროსადგურ „თავისუფლებასთან“, მაღაზიის სახურავზე ნაპოვნი ორი ადამიანის გარდაცვალების მიზეზს.
„ყოფილი ხელისუფლების საგამოძიებო უწყების ვერსიით, მათი გარდაცვალება ელექტროსადენებთან შესაძლო კავშირმა გამოიწვია. პროკურატურამ გვამების ექსჰუმაცია უკვე ჩაატარა და არ არის გამორიცხული, რომ ამ კონკრეტული საქმის სამართლებრივი შედეგი უახლოეს მომავალში დადგეს და 26 მაისის საქმეზე ბრალდებულებისა და მსჯავრდებულების სია კიდევ უფრო გაიზარდოს“, - იუწყება ტელეკომპანია.
შეგახსენებთ, რომ 2011 წლის 26 მაისს ხელისუფლებამ ქცია დაარბია. წლების შემდეგ, სამივე ინსტანციის სასამართლომ უკანონო ბრძანებით უფლებამოსილების გადამეტებაში ყოფილი ხელისუფლების შსს-მინისტრი ვავო მერაბიშვილი დამნაშავედ სცნო. საქმეზე ძალის გამოყენებით უფლებამოსილების გადამეტებისთვის ბრალი შინაგან საქმეთა სამინისტროს ხუთ ყოფილ მაღალჩინოსანს აქვს წარდგენილი, რაც გამოიხატა 2011 წლის 26 მაისს მიტინგის დარბევისას. მათი დავალებით და ბრძანებით, მომიტინგეები სამართალდამცავებმა ალყაში მოაქციეს. მომიტინგეების მიმართ განხორციელდა სხვადასხვა სახის იძულების ღონისძიებები. მოქალაქეებს ესროდნენ რეზინის ტყვიებს გამოიყენეს ასევე ხელკეტები და წყლის ჭავლი. შედეგად 250 ადამიანს ჯანმრთელობა დაუზიანდა, ხოლო 800-მდე პირი დააკავეს.
