„რევანშისტული აგრესიული საფრთხე ჩვენ თვალწინ არის, ყალიბდება, – ამის შესახებ პოეტმა დავით მაღრაძემ მოძრაობის „მე ვიცავ თავისუფლებას“ ორგანიზებით თელავში გამართული შეხვედრის დროს განაცხადა.
მისივე თქმით, საქართველოში არავის დაავიწყდება „ნაციონალური მოძრაობის“ავკაცობა, უზნეობა და სისასტიკე.
„რევანშისტული აგრესიული საფრთხე ჩვენ თვალწინ არის, ყალიბდება. მოდიან ათასნაირი პროვოკაციით, ათასნაირი მაქინაციით, რომლითაც თავი ისახელეს თავის დროზე. ძალიან საინტერესო არის მათი მოწოდება, რომ დაივიწყეთ ამ ცხრა წელიწადზე ნუღარ ილაპარაკებთო. კი ბატონო, დავივიწყებთ, მაგრამ თვითონ რატო არ ივიწყებენ ხელისუფლებისთვის ლტოლვას? თავიანთ სკამს რატომ ვერ ივიწყებენ. ვიდრე თავიანთი სკამი ემახსოვრებათ, არავის დაავიწყდება საქართველოში მათი ავკაცობა, მათი უზნეობა და სისასტიკე”, - განაცხადა მაღრაძემ და აღნიშნა, ხელისუფლების მხრიდან მოსახლეობამ იგრძნო უპატივცემულება და ამ არჩევნებზე თავისი ღირსება აჩვენა.
„ხელისუფლების მხრიდან მოსახლეობამ იგრძნო უპატივცემულება და ამ არჩევნებზე თავისი ღირსება აჩვენა ხელისუფლებას. მოსახლეობის პატივისცემა გამოიხატება ყველაზე მეტად საზოგადოებრივი აზრის გათვალისწინებაში, როცა მათ აზრს არ ითვალისწინებ და არამედ აბუჩად იგდებ, მაშინ რა თქმა უნდა, მოსახლეობის და ხალხის ხმა ადეკვატური უნდა იყოს. ის ექო, რაც გაისმა ამ არჩევნებზე, იყო ადეკვატური მისდამი უპატივცემულობისა, რაც ხალხმა იგრძნო“,- განაცხადა დავით მაღრაძემ.