მირზა სუბელიანი ადვოკატი, ეკა ხუციშვილი, "ჯი-ეიჩ-ენთან" ადასტურებს, რომ გუშინ, მირზა სუბელიანს საპყრობილეში სუიციდის მცდელობა ჰქონდა.
"გუშინ საღამოს ჰქონდა სუიციდის მცდელობა. ეს ალბათ, ადმინისტრაციამ ნახა, მასზე ხომ მიდის ვიზუალური თვალთვალი და ალბათ, ისინი შევიდნენ.
დღეს მოვინახულეთ ნამდვილად სტრესულ მდგომარეობაშია, გამომძიებელიც იყო შემოსული მაგრამ მისი გამოკითხვა ვერ მოხერხდა, რადგან მძიმე ფსიქოლოგიური მდგომარეობა აქვს. დეტალებზე არ გვისაუბრია, რადგან დამამშვიდებლები ჰქონდა დალეული და ფაქტობრივად, ეძინა", - აცხადებს ხუციშვილი.
კითხვაზე, იცის თუ არა, სუბელიანმა ჩანაწერების გავრცელების შესახებ და თვითმკვლელობის მცდელობა უკავშირდება თუ არა, ამ ფაქტს ადვოკატი პასუხობს, რომ სუბელიანისთვის ჩანაწერების გავრცელება ცნობილია.
"ჩანაწერების გავრცელების ფაქტი მისთვის ცნობილია, რადგან იცოდა გამომძიებლები რატომ იყვნენ მასთან შესულები, უბრალოდ მისი ფსიქოლოგიური მდგომარეობის გამო მიზანშეწონილი არ იქნებოდა მისი გამოკითხვა.
ზოგადად, მისი სტრესული მდგომარეობა მთელი ამ ხნის განმავლობაში, ძალიან მძიმეა. მოგეხსენებათ, 4 თვეა, სამარტოვო საკანშია. ისედაც რამხელა უბედურება დაატყდა მის ოჯახს თავს, ყველაფერმა ერთად იმოქმედა", - დასძენს ხუციშვილი.
სუბელიანთან ადვოკატები მას შემდეგ შევლენ, რაც მისი ფსიქოლოგიური მდგომარეობა გაუმჯობესდება და მისი გამოკითხვა შესაძლებელი გახდება.
