უფრო მეტი მოლოდინი მქონდა და მეგონა, რომ უფრო მეტ კითხვას დამისვამდნენ საქმის შინაარსთან და სხვადსხვა ფაქტობრივ გარემოებებთან დაკავშირებით, - ასე შეაფასა ხორავას ქუჩაზე მომხდარი მკვლელობის საქმეზე შექმნილი დროებითი საგამოძიებო კომისიის მიერ მისი გამოკითხვა ქვეყნის ყოფილმა მთავარმა პროკურორმა, ირაკლი შოთაძემ.
როგორც ის განმარტავს, ხორავას ქუჩაზე არსებული ფარდულის დაგნრევის თემით სპეკულირება ხდებოდა და ის მოსახლეობა საკუთარი სურვილით დაანგრია.
„რაც შეეხება კონკრეტულ კითხვის ნიშნებს, არსებობდა სპეკულაციები, რომ თითქოს ეს ფარდული პოლიციელებმა განზრახ დაანგრიეს, დადგენილია დღესდღეობით, მათ შორის კომისიის მიერაც, რომ ფარდული არა პოლიციელების, არამედ თვითონ ადგილობრივი მოსახლეობის მიერაა დანგრეული, საკუთარი სურვილით. რაც შეეხება გაღუნულ დანას, შემიძლია გითხრათ, რომ ის გაღუნული არაა, არამედ აქვს მცირედი დეფორმაცია, რომელიც მიკროსკოპულადაა ხილვადი და ექპსერტიზებისთვის თუ საგამოძიებო ექსპერიმენტებისთვის გამოყენებადია. შესაბამისად, ეს მტკიცებულება არაა დაზიანებული და განადგურებული.
სისხლის სამართლის საპროცესო კოდექსით შემთხვევის ადგილი უნდა იყოს დაცული, იქამდე ვიდრე ამ შემთხვევის ადგილის დათვალიერება არ მოხდება. დათვალიერდა შემთხვევის ადგილი, დაფიქსირდა და პროცესუალურად მოხდა ადგილზე არსებული მტკიცებულებების დამაგრება და შესაბამისად შემდგომ, შინაგან საქმეთა სამინისტროს არანაირი ვალდებულება არ გააჩნდა ამ ფარდულის დაცვის“, - განაცხადა შოთაძემ.
რაც შეეხება მიხეილ კალანდიას პასუხისმგებლობის საკითხს, როგორც ის განმარტავს, საქმის მასალებს არ იცნობს, ვინაიდან მთავარი პროკურორი აღარ არის.
„მიხეილ კალანდიასთან მიმართებაში რა იკვეთება ვერ გეტყვით, რადგან აღარ ვარ მთავარი პროკურორი და რა ხდება დღეის მდგომარეობით გამოძიებაში, ჩემთვის უცნობია. იმ პერიოდისთვის, როცა მე მთავარი პროკურორი ვიყავი, მ.კ.-ს რა დანაშაულიც დაუდგინდა, კონკრეტულად დანაშაულის დაფარვა, ამ ფაქტზე ის სისხლის სამართლის პასუხისგებაში მიეცა“, - აცხადებს შოთაძე.
